By Nga Brixhilda Xhuraj
Ëngjëll Brahimi, i cili i dyshohet se ka jetuar në Montreal të Kanadasë prej vitesh me një identitet të rremë për të shmangur burgun në Shqipëri, ku u dënua në mungesë për vrasjen e një oficeri policie dhe djalit të tij, u lirua me kusht këtë të enjte të 18 majit.
Qeveria shqiptare pretendon se Brahimi vrau oficerin e policisë, Astrit Braçe, dhe djalin e tij 8-vjeçar, në një pritë me armë zjarri më 10 gusht të vitit 2000.
Gjyqtari François Dadour ra dakord me kërkesën e avokatëve që përfaqësonin Brahimin, që ai të lirohej ndërkohë që çështja e ekstradimit është në pritje.
Po ashtu sot u vendosën një sërë kushtesh që ai duhet t’i zbatojë.
Përveç kushteve standarde të lirimit me kusht – që ai të ruajë qetësinë, të respektojë një shtetrrethim dhe të paraqitet në datat e ardhshme gjyqësore – një palë e tretë ra dakord të bënte një depozitë prej 20 mijë dollarësh për të mbështetur kërkesën e Brahimit për lirim me kusht.
Brahimi dhe gruaja e tij gjithashtu ranë dakord të vendosnin një detyrim prej 100 mijë dollarësh në pronën që zotëronin.
Gjykatësi vendosi gjithashtu një kusht jashtëzakonisht të rreptë që kërkon që Brahimi të raportojë në çdo ditë jave, ndërkohë që ai është i lirë me kusht.
Normalisht, një personi të cilit i është dhënë lirimi me kusht në një çështje penale kërkohet të paraqitet në një stacion policie një herë në javë ose një herë në muaj.
Çështja do të kthehet në gjykatë më 26 qershor.
Në janar, qeveria shqiptare kërkoi ekstradimin e Brahimit ndërsa pretendonte se ai jeton prej vitesh në Kanada me emrin Piro Kota.
Avokatët e Brahimit kanë pranuar se Kota është me të vërtetë Brahimi.
“Është çështje e mjaftueshmërisë së provave që ai është autori (i dënuar në mungesë në Shqipëri)”, tha avokati, i cili shtoi se “me po sfidojmë besueshmërinë e provave atje”.
“Më 21 maj 2001, kërkuesi u shpall fajtor në mungesë nga një gjykatë shqiptare për vrasje me paramendim për shkak të hakmarrjes, vrasje të kryer në rrethana të tjera specifike, tentativë vrasjeje dhe armëmbajtje pa leje. Dy nga viktimat mbetën të vrarë, njëri prej të cilëve fëmijë. Tjetri ishte ish-shefi i hetuesisë në qarkun shqiptar të Fierit”, deklarata shqiptare e depozituar në kërkesën për ekstradim.
Brahimi u arrestua në Montreal më 26 janar, por ai ështe një nga personat që bën pjesë në listën e më të kërkuarve në Shqipëri. / /Albanianpost.com
