Më 13 Qershor 2026, Komuniteti shqiptar në Kanada do të mblidhet sërish rreth një tradite të shumëpritur “Sofra Tironce”, e cila këtë vit shënon edicionin e pestë.
Ky event tashmë tradicional organizohet në prag të sezonit veror dhe është kthyer në një simbol të bashkimit, miqësisë dhe ruajtjes së identitetit kulturor shqiptar në diasporë. “Sofra Tironce” lindi si një ide e përbashkët e Ramazan Këllezit dhe Rudina Lugës, ndërsa prej vitesh organizohet nën ombrellën e Shoqatës Kulturore Shqiptare Shqiponjat e Vogla”, me president profesor Ramazan Këllezi.
Qëllimi i kësaj mbrëmjeje është promovimi dhe ruajtja e traditave tironse, kostumeve popullore dhe kulturës së pasur qytetare të Tiranës, duke sjellë për publikun shqiptar në Kanada një atmosferë autentike shqiptare.
Edhe këtë vit, organizatorët kanë përgatitur një program artistik të jashtëzakonshëm me emra të njohur të muzikës dhe artit shqiptar. Të ftuar specialë të mbrëmjes do të jenë Mbretëresha e këngës tironce, Merita Halili, së bashku me mjeshtrin e fizarmonikës shqiptare, Raif Hyseni, të cilët pritet të ndezin atmosferën me interpretimet dhe meloditë e tyre të dashura për publikun.
Pjesë e eventit do të jetë edhe klarinetisti i talentuar Igli Tuga, i cili ka përfaqësuar Shqipërinë në festivale prestigjioze ndërkombëtare në Europë dhe Amerikën e Veriut.
Një rol të rëndësishëm në krijimin e atmosferës festive do të ketë edhe DJ. Erind Emiri, i cili prej pesë vitesh është pjesë e pandarë e “Sofrës Tironce”, duke harmonizuar artistët dhe publikun me energjinë dhe profesionalizmin e tij.
Një ndër momentet më emocionuese të mbrëmjes pritet të jetë performanca e grupit të valleve “Shqiponjat e Vogla”, nën drejtimin e koreografit Këllezi, i cili prej më shumë se 15 vitesh vazhdon të promovojë kulturën shqiptare në Kanada përmes vallëve tradicionale. Përveç valleve tironse, publiku do të ketë mundësinë të shijojë edhe valle nga treva të ndryshme shqiptare si Peshkopia, Mati, Kosova dhe këtë vit motive të veçanta myzeqare.
Një surprizë artistike e këtij edicioni do të jetë interpretimi elegant i “Second Waltz” nga Dmitri Shostakovich, realizuar nga Elia Pasha dhe balerini shqiptar Albjon Gjorllaku, artist i angazhuar prej vitesh në National Ballet of Toronto, me koreografi nga Ramazan Këllezi.
Ashtu si çdo vit, një vend të veçantë në këtë event zë edhe gastronomia tradicionale tironce. Eni Xhihani do të kujdeset për gatimet autentike shqiptare, ndërsa Adi Brari do të sjellë ëmbëlsirat tradicionale që konsiderohen “qershia mbi tortë” e kësaj nate festive.
Përgjatë viteve, organizatori dhe moderatori i eventit, ka nderuar figura dhe familje tironse që kanë kontribuar në ruajtjen e traditave dhe kulturës shqiptare, duke i vlerësuar me Trofeun e Mirënjohjes. Edhe këtë vit janë përgatitur tre trofe të veçantë, emrat e të cilëve do të mbeten surprizë deri në natën e eventit.
“Sofra Tironce” vazhdon të mbetet një nga ngjarjet kulturore më të rëndësishme për komunitetin shqiptar në Kanada, duke bashkuar breza të ndryshëm shqiptarësh përmes muzikës, traditës dhe krenarisë kombëtare.
Nga Blerina Ruka/ Albanian Montreal Press
By 
