By 
Edicioni i dytë i Festivalit të Librit në Toronto u realizua edhe këtë vit nga Albanian Canadian Development Alternative (ACDA), duke e kthyer festivalin në një nga aktivitetet më të rëndësishme kulturore të komunitetit shqiptar në Kanada. Për dy ditë me radhë, panairi solli së bashku autorë, studiues, artistë, lexues dhe dashamirës të librit shqip në një atmosferë të mbushur me kulturë, emocion dhe krenari kombëtare.
Në mes atmosferës së ngrohtë të komunitetit shqiptar në Kanada, pata privilegjin të takoj për herë të parë një nga zërat më të veçantë të letërsisë shqiptare, Rita Petro. Ishte një takim që tejkaloi kufijtë e një aktiviteti kulturor dhe u kthye në një përjetim të rrallë njerëzor, artistik dhe emocional.
Në kuadër të aktivitetit “BookFest”, autorja solli para publikut jo vetëm krijimtarinë e saj të njohur, por edhe forcën e një gruaje me shpirt të lirë, me mendim të hapur dhe me një ndjeshmëri që ndihej në çdo fjalë të saj. Në bisedën letrare të moderuar nga Flurans Ilia, Rita Petro foli me sinqeritet për jetën, letërsinë, gruan, dashurinë dhe sfidat e kohës moderne, tema që prekën thellë publikun shqiptar të diasporës.
Autorja, e njohur për librat e saj të suksesshëm si Vrima, Lindur së prapthi, Kënga e turmës e mjaft të tjera, solli në Toronto të njëjtën forcë emocionale dhe ndjeshmëri artistike që e ka bërë një nga emrat më të dashur të letërsisë bashkëkohore shqiptare. Përmes poezisë dhe prozës së saj, ajo ka ditur të prekë tema delikate me një guxim femëror dhe një sinqeritet që rrallë gjendet.
Por magjia e vërtetë e këtij takimi nuk mbeti vetëm në sallën e aktivitetit. Orët që ndamë më pas në një darkë të ngrohtë në zemër të Torontos, sollën një tjetër dimension të autores: atë të gruas elegante, spontane dhe jashtëzakonisht njerëzore. Mes bisedave të gjata, humorit të hollë dhe reflektimeve për jetën e artin, Rita Petro krijoi një atmosferë të rrallë afërsie, sikur çdo fjali e saj të kishte fuqinë të çlironte emocion dhe frymëzim.
Ajo mbetet një autore që nuk shkruan për të impresionuar, por për të prekur shpirtin. Pikërisht kjo e bën publikun shqiptar ta dëgjojë me kaq vëmendje: autenticiteti i saj. Në një kohë kur shpesh mungon guximi për të thënë të vërtetat e brendshme, Rita Petro sjell një zë të lirë, femëror dhe të sinqertë, që sfidon paragjykimet dhe afron lexuesin me vetveten.
Prania e saj në Toronto solli një energji të veçantë në diasporë, një lloj magjie femërore që bashkoi artin, kulturën dhe kujtesën shqiptare larg atdheut. Takimi me të mbetet jo vetëm një kujtim i bukur personal, por edhe një dëshmi se letërsia shqiptare vazhdon të krijojë ura të forta mes shqiptarëve kudo në botë.
Nga Blerina Ruka
