By Një zhvillim i rëndësishëm për komunitetin shqiptar dhe kosovar në Kanada është bërë publik sot, pasi Republika e Kosovës dhe Provinca e Ontario-s kanë nënshkruar zyrtarisht marrëveshjen për njohjen dhe konvertimin e lejes së drejtimit mes dy vendeve.
Marrëveshja vjen pas një periudhe të gjatë bashkëpunimi dhe angazhimesh ndërinstitucionale ndërmjet autoriteteve të Kosovës dhe atyre të Ontario-s, duke shënuar një hap konkret në lehtësimin e procedurave për qytetarët e të dyja vendeve.
Sipas marrëveshjes, qytetarët e Republikës së Kosovës që jetojnë në Ontario do të mund të konvertojnë patentë-shoferët e tyre kosovarë në patentë të Ontario-s pa pasur nevojë t’i nënshtrohen testit teorik apo provimit praktik të lejes së drejtimit.
Në të njëjtën mënyrë, edhe qytetarët kanadezë nga Ontario do të kenë mundësi të konvertojnë lejee e drejtimit e tyre në patentë të Republikës së Kosovës në rast se vendosin të jetojnë ose të qëndrojnë në Kosovë.
Konsullata e Përgjithshme e Republikës së Kosovës në Toronto bëri të ditur se ka qenë e përfshirë në këtë projekt që nga fazat e para të tij, ndërsa shprehu mirënjohje për institucionet e Provincës së Ontario-s dhe zyrtarët që kontribuan në finalizimin e marrëveshjes.
Falënderime të veçanta iu drejtuan Ministrit të Transportit të Ontario-s, Prabmeet Singh Sarkaria, bashkëpunëtorëve të tij, si dhe Shefes së Protokollit të Ontario-s, Veronica Panton dhe stafit të saj.
Autoritetet kanë njoftuar se së shpejti do të publikohen edhe procedurat zyrtare dhe mënyra konkrete e aplikimit për ndërrimin e lejes së drejtimit.
Kjo marrëveshje konsiderohet një hap i rëndësishëm në forcimin e marrëdhënieve ndërmjet Kosovës, Provincës së Ontario dhe Canada, duke lehtësuar jetën e mijëra qytetarëve të komunitetit shqiptar në Kanada.
