By Kanada – Me një bagazh të pasur kulturor dhe një përkushtim të gjatë ndaj gazetarisë dhe çështjeve shoqërore, gazetarja dhe aktivistja e komunitetit, Arta Rexhepi, vajza e artistit të njohur kanadezo-shqiptar Zeqirja Rexhepi, ka shpallur krijimin e fondacionit të saj. Ky fondacion vjen si një iniciativë që synon të ndërthurë artin, humanizmin dhe trashëgiminë kombëtare në projekte me ndikim afatgjatë shoqëror.
Duke ardhur nga një familje që ka lënë gjurmë të thella në kulturën dhe artin shqiptar, Arta ndan të njëjtën trashëgimi krijuese edhe me motrën e saj, aktoren dhe këngëtaren e njohur Tringa Rexhepi. Në karrierën e saj si gazetare në Kanada, ajo është dalluar për vëmendjen ndaj historive njerëzore, çështjeve shoqërore dhe dhënien e zë çështjeve me rëndësi publike, duke fituar respekt e besim të gjerë.
Një bord drejtues i fuqishëm dhe i përkushtuar
Fondacioni do të udhëhiqet nga një bord drejtues i përbërë nga gra të afirmuara në fusha të ndryshme:
- Venesa Sulimani – aktiviste për të drejtat e njeriut, bijë e një të mbijetuari.
- Ilirjana Latifi – presidente e Shoqatës Shqiptare “Kosova” në Montreal, e njohur për përkushtimin ndaj diasporës shqiptare.
- Shkendije Ibishi – autore e njohur për tregimet e saj të ndjeshme dhe autentike.
- Arnisa Morina – avokate në Toronto, e angazhuar në kauza ligjore dhe sociale.
- Blerina Ruka – redaktore dhe themeluese e “Albanian Montreal Press” dhe “Whoman Canada Magazine”, një zë i rëndësishëm i komunitetit shqiptaro-kanadez.
- Edlira Begeja Cini – Këshilltare për Donatorët dhe Sponsorët.
- Belinda Lahu – Asistente Ekzekutive dhe Koordinatore për Rrëfimin Digjital
Misioni dhe vizioni
Fondacioni synon të zhvillojë nisma kulturore, artistike dhe humanitare që fuqizojnë komunitetet, ruajnë identitetin kombëtar dhe promovojnë vlerat universale të drejtësisë, krijimtarisë dhe solidaritetit.
“Ky është një hap që e ndjej si një detyrim moral dhe një pasion shpirtëror,” – tha Arta Rexhepi. “Jam mirënjohëse që kam pranë vetes gra të jashtëzakonshme që ndajnë këtë vizion.”
Përmes kësaj iniciative, Arta Rexhepi jo vetëm që afirmon përkushtimin e saj personal, por ngre edhe një thirrje të fuqishme për veprim kolektiv dhe bashkëpunim. Fondacioni synon të kthehet në një pikë referimi për artin, kulturën dhe humanizmin, duke ndërtuar ura të reja mes diasporës shqiptare dhe shoqërisë më gjerë.
