By Të dashur lexues,
Prej më shumë se shtatë vitesh, Albanian Montreal Press (AMP) ka qenë pjesë e pandashme e komunitetit shqiptaro-kanadez, duke ndarë me ju lajme, intervista dhe ngjarje që pasqyrojnë identitetin, kulturën dhe krenarinë tonë kombëtare. Ky vit ishte një tjetër kapitull i suksesshëm në misionin tonë për të mbështetur dhe promovuar zërin e diasporës shqiptare në Kanada.
Një vit i pasur me ngjarje dhe tradita
Një prej aktiviteteve që vazhdon të mbetet simbolik për shqiptarët e Montrealit është takimi i përvitshëm pranë bustit të Nënë Terezës, në bulevardin Monk. Ky homazh i përbashkët ndaj shenjtores shqiptare na kujton çdo vit krenarinë dhe vlerat tona të përbashkëta.
Promovimi i librit “Fan Noli – Apostulli” nga Ilir Ikonomi
Një ngjarje e veçantë që vlen të theksohet ishte pranimi i ftesës nga biografi shqiptaro-amerikan dhe zëri ikonik i Voice of America, Ilir Ikonomi, për të promovuar librin e tij të fundit në Montreal. Falë mbështetjes së Shoqatës Kulturore Shqiptare Montreal, ky aktivitet u shndërrua në një takim letrar mbresëlënës, ku komuniteti pati mundësinë të takohej nga afër me autorin dhe të eksploronte veprën e tij. Ky moment na afroi më shumë me historinë dhe trashëgiminë tonë kombëtare.
Takimi me Zëvendëskryeministren e Kosovës, znj. Donika Gërvalla
Në muajin nëntor, AMPress pati nderin të moderonte një takim mes diasporës shqiptare në Montreal dhe Zëvendëskryeministres së Republikës së Kosovës, znj. Donika Gërvalla, e cila është edhe Ministre e Diasporës. Ky aktivitet, organizuar me mbështetjen e Shoqatës Shqiptare të Kosovës dhe Ambasadës së Kosovës në Ottawa, ofroi një mundësi të vyer për diskutime mbi politikat dhe perspektivat që lidhin Kosovën me mërgatën e saj të fuqishme.
Festivali i Librit në Toronto – Një arritje historike
Një tjetër moment i rëndësishëm ishte Festivali i Librit, i organizuar në Toronto nga Rudin Dakli dhe ACDA. Ky festival dyditor mblodhi 775 tituj, 81 shtëpi botuese dhe 388 autorë shqiptarë, duke shërbyer si një platformë unike për promovimin e kulturës dhe letërsisë shqiptare. Edhe shkrimtarët e Montrealit, si Flurans Ilia dhe Valbona Ahmeti, ishin pjesë e këtij aktiviteti që tejkaloi çdo pritshmëri, duke nxitur interes të madh nga lexuesit shqiptarë dhe duke krijuar një traditë të re për diasporën tonë.
Zhvillimi i mëtejshëm i Whoman Magazine
Nën produksionin e AMPress, Whoman Canada Magazine ka vazhduar të rritet si një platformë inovative që sjell në vëmendje profile frymëzuese të shqiptarëve dhe profesionistëve ndërkombëtarë. Me përfshirje të sipërmarrësve, të rinjve ambiciozë dhe projekteve me vlerë, revista mbetet një pasqyrë e diversitetit dhe potencialit të komunitetit tonë.
Faleminderit për mbështetjen tuaj!
Falënderojmë të gjithë ata që na kanë mbështetur përgjatë këtij viti – lexuesit, bashkëpunëtorët dhe komunitetin tonë të jashtëzakonshëm. Kontributi juaj na motivon të vazhdojmë këtë rrugëtim me përkushtim dhe pasion.
Gëzuar Krishtlindjet dhe Vitin e Ri 2025!
Në emër të Albanian Montreal Press, ju uroj një vit të ri të begatë, të shëndetshëm dhe plot suksese. Qoftë viti 2025 një kapitull i ri i mbushur me realizime në jetën tuaj personale dhe profesionale.
Me respekt,
Blerina Ruka
Drejtuese e Albanian Montreal Press
