Trudeau paralajmëron: Mos udhëtoni, rrezikoni të mbeteni jashtë Kanadasë

OTTAWA – Kryeministri i kanadasë Justin Trudeau, paralajmëroi të premten se kushdo që do të udhëtojë jashtë Kanadasë mund të përballet me probleme të konsiderueshme për t’u kthyer në shtëpi, pasi provat e reja sugjerojnë se disa variante COVID-19 janë edhe më të transmetueshme dhe më vdekjeprurëse.
“Askush nuk duhet të marrë pushime jashtë vendit tani, nëse e keni planifikuar, anulojeni. Mos rezervoni asnjë udhëtim për pushimet e pranverës”- tha Trudeau. “Qeveria do të përshkallëzojë masat që të pengojnë ndjeshëm rikthimin në Kanada edhe pa paralajmërim”.
Prej fillimit të pandemisë, këshilltarët e Qeverisë kanë paralajmëruar evitimin e çdo udhëtimi jo-thelbësor, por jo të gjithë janë bindur.
Pas prezantimit të masave të rrepta dhe minimizimit të rolit që luan udhëtimi ndërkombëtar gjatë pandemisë në Kanada, qeveria pati prezantuar kërkesa të reja testimi për udhëtarët ndërkombëtarë që hyjnë në Kanada që nga fundi i dhjetorit.
Dy javët e fundit ka pasur disa raporte të rasteve të reja në shumë fluturime duke përfshirë Europën apo Amerikën e Jugut . Dhjetëra prej këtyre fluturimeve kanë sjellë me vete mjaft udhëtarët të ekspozuar ndaj virusit.
Trudeau nuk specifikoi masat e mëtejshme që mund të vendosen dhe nuk ndërmori asnjë hap të menjëhershëm, por Ministri i Sigurisë Publike Bill Blair, tha se gjithçka ishte në tryezë duke përfshirë karantinat e detyrueshme të hoteleve dhe ndalimet e plota të udhëtimit.
“Ne do të përshkallëzojmë një numër masash që mund të përfshijnë kufizime të mëtejshme në udhëtimet ndërkombëtare, masa shtesë gjurmuese, masa shtesë karantine dhe masa zbatimi në mënyrë që të mos i inkurajojmë njerëzit të bëjnë udhëtime të panevojshme.” Bler theksoi se masat e karantinës së Kanadasë janë disa nga më të ashprat në botë tashmë, por qeveria nuk do të hezitojë të shkojë më tej.
Disa variante të virusit për t’u konsideruar janë gjetur në vendet si Brazili, Afrika e Jugut apo Britania e Madhe.
Në një deklaratë për shtyp, Këshilli Kombëtar Ajror i Kanadasë u shpreh se udhëtimet ndërkombëtare kanë rënë 93 përqind dhe udhëtarët aktualisht përfaqësojnë më pak se një përqind të rasteve të reja në Kanada.