By Nesër është dita Europiane e Përkujtimit të Viktimave të Komunizmit.
Pikërisht në këtë ditë, Qeveria shqiptare vendos të respektojë familjet e viktimave duke shfaqur shtatoret e Leninit dhe të Stalinit në oborret e vilave të luksit të parisë komuniste. Këto vila, të vjedhura me dhunë nga pronarët e ligjshëm, janë sot rezidenca qeveritare, ku pret e përcjell paria rilindase.
Më tregoni një vend ish-komunist evropian ku nxihet kujtimi i viktimave duke mbirë pa asnjë plan, rregull, mbishkrim, tabelë, trajtim, shpjegim, lajmërim apo konsultim statuja të vrasësve masivë. Më tregoni një vend ku muzetë e kujtesës krijohen me trajta nostalgjike, larg vendeve reale të vuajtjes së dënimit, duke vendosur në piedestal sendet e rëndomta të sigurimit apo ushtrisë së dhunës komuniste.
A keni parë ndonjëherë uniformat e SS të ekspozuara në kampin famëkeq të Auschwitz?
Po telefonin me të cilin urdhërohej hapja e gazit?
Po radion muzikore me të cilën shtynte kohën gardiani ndërkohë që viktimat shkumonin nga gazi?
Po sende të tjera të rëndomta të oficerëve gjakatarë, të cilat bojatisin me aureolë nostalgjike realitetin e kohës dhe, njëkohësisht, kriposin plagët e viktimave, a keni parë?
Çfarë do të ndodhte nëse Polonia injoronte totalisht kampin famëkeq, siç kemi injoruar ne Burrelin, Spaçin, Qafë Barin etj. dhe ndërtonte një sajesë të kotë në mes të Varshavës? Më thoni një vend ku transmetohen rëndom, pa shpjegim paraprak dhe trajtim të specializuar, filmat e rrenave të propagandës komuniste me partizanë që, kur armiku sulmonte, nuk denjonin as të ndërprisnin rruajtjen e mjekrës? Mund të vazhdoj pa fund me shembuj se si vazhdojnë të hedhin kripë mbi plagët tona.
Por, nga ana tjetër pyes veten: Çfarë pret realisht? Çfarë pret kur biri i babait vrasës, i cili e lartëson të atin me krenari edhe sot, ende sundon? Nesër është dita përkujtimore. Nesër të persekutuarit do të ecin rrugës së vilave, do të shikojnë Stalinin, do të ulin kokën dhe do të vazhdojnë rrugën e tyre, atë të vuajtes, duke duruar djegien e kripës në plagën që nuk u mbyll kurrë!
Zoti ndriçoftë sakrificat e familjeve të vuajtura dhe u lartësoftë rangun!
Lutjen për persekutorët e bëj në heshtje, në përulje me Zotin tim.
Ata nuk dëgjojnë.
Ai po.
