By Pajtimi dhe shërimi janë në qendër të udhëtimit të Papës Françesku në Kanada, që nis të diel, më 24 korrik për të përfunduar më 30. Një “shtegtim pendestar” siç e quajti vetë Papa në Engjëllin e 17 korrikut, “në emër të Jezusit për “të takuar dhe për të përqafuar popujt indigjenë”, “të dëmtuar rëndë” në të kaluarën nga “politikat e asimilimit kulturor, kryera nga shumë të krishterë”. Kryetari i Konferencës Ipeshkvnore Katolikë të vendit, imzot Raymond Poisson, ipeshkëv i dioqezës Saint-Jérôme-Mont-Laurier, flet për udhëtimin papnor dhe shpresat që sjell me vete.
“Kjo vizitë historike është pjesë e një sërë gjestesh që ne ipeshkvijtë i kemi kërkuar që nga shtatori i kaluar, për të nxitur atmosferën e pajtimit me vëllezërit dhe motrat tona vendase. Ajo që ndodhi në shkollat rezidenciale është një periudhë e errët në historinë kanadeze dhe ka të bëjë me gjithë çështjen e respektimit të kulturës së tyre, por edhe të vendit tonë, sepse po flasim për njerëz që qenë banorët e parë të Kanadanë. Filluam të punonim me ta në grupe dëgjimi në terren. Më pas, në dhjetor 2019, nisa të flisja me Atin e Shenjtë për mundësinë e ardhjes së një delegacioni në Romë dhe të udhëtimit papnor në vend.
Kjo vizitë ishte kërkuar tashmë që në vitin 2015 nga Komisioni për të Vërtetën dhe Pajtimin nën kujdesin e qeverisë, dhe Papa atëherë ishte entuziast. Pas dy shtyrjeve për shkak të pandemisë, një përfaqësi indigjene shkoi në Vatikan marsin e kaluar. Dhe kështu u krye gjesti i parë i pajtimi dhe fakti që ai ishte shtyrë dy herë nuk bëri gjë tjetër, veçse shtoi interesin për këtë delegacion nga ana e vëllezërve tanë dhe motrave tona vendase. Kjo është arsyeja që, në seancën e 1 prillit të kaluar, përfunduam me mbi 150 persona. Ky ishte rasti që Papa të dëgjonte dëshmitë e të mbijetuarve dhe të mbijetuarave, të moshuar e të rinj. Në bashkim me ne, ipeshkvijtë e Kanadasë, Papa lypi të falur për abuzimet që u bënë nga anëtarët e Kishës në atë periudhë historike.
Prandaj, shtegtimi papnor pason këtë udhëtim dhe synon të jetë një hap më tej. Ai sjell pajtim, ndoshta më shumë pajtim, sesa falje, për faktin e thjeshtë se Papa është mes nesh. Në bankat e njërës prej këtyre shkollave Papa do të takojë të mbijetuarit, do të kremtojë meshën publike, me rastin e festës së Shën Anës, një figurë shumë domethënëse për të gjithë, emblematike për indigjenët, do të marrë pjesë në takime autoktone dhe jo autoktone. Pra, bëhet fjalë për gjeste konkrete pajtimi, të cilat shpresojmë se do të vijojnë me realizimin e projekteve tona së bashku me ta. Ne kemi caktuar një fond prej 30 milionë dollarësh kanadezë për të mbështetur projekte të njohjes së ndërsjellë, kulturës së tyre shpirtërore, historisë së tyre, pasi e gjithë shoqëria kanadeze është larg realitetit të vëllezërve dhe motrave tona vendase, dhe anasjelltas. Sigurisht që nuk mund të pretendojmë se e njohim mirë njëri-tjetrin. Ka shumë punë për të bërë, vizita e Atit të Shenjtë do të na ndihmojë!
