By Danjeza Danglli dhe Mendi Kabashi drejt garës elektorale, komuniteti shqiptar mobilizohet në mbështetje të kandidateve
Takim në Toronto me pjesëmarrjen e ish-politikanit dhe ushtarakut kanadez Ted Opitz, përfaqësuesve të biznesit dhe anëtarëve të komunitetit shqiptar
TORONTO – Në prag të zgjedhjeve bashkiake, komuniteti shqiptar në Ontario po rrit angazhimin dhe mbështetjen për dy kandidatet shqiptaro-kanadeze, Danjeza Danglli dhe Mendi Kabashi, të cilat synojnë përfaqësimin në këshillat bashkiakë.
Një takim i zhvilluar së fundmi në Toronto mblodhi së bashku dy kandidatet, miq dhe mbështetës të fushatave të tyre, përfaqësues të biznesit dhe anëtarë të komunitetit, si dhe personalitete me përvojë në politikën dhe jetën publike kanadeze.
I pranishëm ishte edhe Ted Opitz, politikan kanadez dhe ish-ushtarak, i cili ka shërbyer për 33 vjet në Forcat e Armatosura Kanadeze, duke arritur gradën e nënkolonelit. Përvoja e tij politike dhe publike solli në takim diskutime mbi sfidat e një fushate elektorale, përgjegjësinë e përfaqësimit dhe raportin që një politikan duhet të ndërtojë me qytetarët.
Një prej temave që tërhoqi vëmendjen ishte pikërisht mënyra se si një politikan duhet ta përballojë kritikën.
“With grace. With humbleness”, “Me dinjitet dhe përulësi”, ishte mesazhi që u përcoll gjatë bashkëbisedimit.
Për Danjeza Dangllin, kritika nuk duhet parë si pengesë, por si pjesë e domosdoshme e jetës publike dhe e procesit të rritjes së një kandidati.
“Kritika është pjesë e politikës, jo vetëm e asaj kanadeze edhe kur nuk na pëlqen menuja. Ndonjëherë duhet ta shijosh me një dorë kripë… dhe ta presësh me dinjitet dhe përulësi”, shprehet ajo.
Takimi u karakterizua nga pyetje të drejtpërdrejta, diskutime të hapura dhe këshilla të sinqerta, duke krijuar një hapësirë ku kandidatet patën mundësi jo vetëm të prezantonin vizionin e tyre, por edhe të dëgjonin mendimet dhe pritshmëritë e njerëzve që i mbështesin.
Danglli ka ndarë gjithashtu një reflektim personal mbi rrugëtimin e saj drejt politikës dhe dilemat që shoqërojnë një angazhim të tillë.
“Ndonjëherë, në gjithë këtë rrugëtim, e pyes veten: A bëj vërtet për këtë punë? A jam e përshtatshme për politikë?”, shkruan ajo, duke theksuar rëndësinë e njerëzve që janë të gatshëm t’i thonë një kandidati të vërtetën “pa filtra, pa zbukurime dhe pa më thënë vetëm atë që dua të dëgjoj”.
Për të, pikërisht aftësia për të dëgjuar mund të jetë një nga cilësitë më të rëndësishme të një përfaqësuesi publik.
“Ndoshta të bësh për këtë punë nuk do të thotë të kesh gjithmonë përgjigjen e duhur. Ndoshta do të thotë të jesh e gatshme të dëgjosh, të pranosh kritikën, të reflektosh dhe të mësosh. Me dinjitet dhe përulësi.”
Dy gra shqiptaro-kanadeze në garën për përfaqësim lokal
Kandidaturat e Danjeza Dangllit dhe Mendi Kabashit i japin një dimension të veçantë këtij cikli zgjedhor për komunitetin shqiptar në Ontario. Përtej dy fushatave individuale, pjesëmarrja e tyre shihet edhe si shenjë e një angazhimi më të madh të shqiptaro-kanadezëve në institucionet dhe jetën politike lokale.
Takimi në Toronto dëshmoi gjithashtu rëndësinë e mbështetjes së komunitetit, jo vetëm përmes pranisë dhe angazhimit qytetar, por edhe përmes kontributit të njerëzve të biznesit dhe mbështetësve që po ndihmojnë financiarisht fushatat elektorale.
Për Dangllin dhe Kabashin, javët në vijim pritet të jenë një periudhë intensive takimesh, komunikimi me qytetarët dhe prezantimi të platformave të tyre, ndërsa gara elektorale hyn në fazën vendimtare.
Por mesazhi që mbeti nga takimi në Toronto ishte më i gjerë se një fushatë apo një rezultat zgjedhor: politika kërkon jo vetëm guximin për të kërkuar besimin e qytetarëve, por edhe pjekurinë për t’i dëgjuar ata, sidomos kur mendimi i tyre është kritik.
Dhe, siç u tha gjatë mbrëmjes, ta bësh këtë “me dinjitet dhe përulësi.”
Blerina Ruka | Albanian Montreal Press – Canada
