By New York – Në kuadër të Luncheon-it të 12-të vjetor me Zonjat e Para, u bashkuan diplomatë, liderë të modës dhe mbrojtës të mjedisit për të vënë në qendër të vëmendjes modën etike dhe përgjegjësinë mjedisore. Tema e këtij viti ishte frymëzuar nga kultura kineze dhe prezantoi stilistë nga Shangai, Hong Kongu dhe Shqipëria, të cilët promovuan praktika të qëndrueshme në industrinë e modës.
Një nga yjet kryesore të eventit ishte stilistja e njohur shqiptare Mirela Nurçe, e cila prezantoi koleksionin e saj duke ofruar një vështrim ekskluziv mbi projektin e ardhshëm Global Runway. Ky projekt do të sjellë në Kombet e Bashkuara stilistë nga 100 vende në një sfilatë të përbashkët, që do të mbahet në vitin 2026. Iniciativa synon të bashkojë diplomacinë dhe zgjidhjet globale përmes modës, duke përforcuar misionin e Fashion 4 Development. Evie Evangelou, themeluesja e kësaj platforme, e përshkroi projektin si “një simbol të tolerancës dhe pajtimit.”
Ndër stilistët e tjerë të shquar ishte edhe Juliet Gao, themeluese e Sandriver Cashmere, një markë që ka rikthyer një teknikë të lashtë të përpunimit me dorë në Mongoli dhe mbështet gratë në Tibet. Po ashtu, u prezantua puna e Wang Feng Couture, e njohur për krijimet e saj të modës së lartë dhe veshjeve të nuseve.
Eventi u shoqërua nga një menu vegane e përgatitur nga Shefi Guo Wenjun, i njohur për restorantin e tij më të shtrenjtë kinez në New York. Yue-Sai Kan, një prodhues kinezo-amerikan dhe prezantuese televizive, bashkë-drejtoi eventin dhe u nderua me Çmimin Vizionar 2024 për kontributin e saj në ndërlidhjen e industrisë së modës mes Kinës dhe Shteteve të Bashkuara.
Eva Orner, prodhuesja fituese e Emmy dhe Oscar, u nderua gjithashtu për dokumentarin e saj të fundit, “Brandy Hellville & the Cult of Fast Fashion,” i cili nxjerr në pah dëmet e modës së shpejtë mbi mjedisin. Dokumentari përfshiu pamje tronditëse të plazheve të Akra-s në Gana, të mbushura me veshje të dhuruara të braktisura.
Eventi përfshiu gjithashtu dhe figurat si Chantal Khoueiry, themeluese e Brides do Good, një organizatë që mbledh fonde për të ndaluar martesat e fëmijëve, si dhe Amy Green, themeluese e Green Vision, një organizatë për mbrojtjen e specieve të rrezikuara dhe ruajtjen e pyjeve tropikale.
Ky show u bëri thirrje pjesëmarrësve të kontribuojnë për një të ardhme më të qëndrueshme dhe etike në industrinë e modës, duke promovuar praktika që ndihmojnë mbrojtjen e mjedisit dhe komuniteteve globale.
