By Në kuadër të Ditës Botërore të Kafshëve, më 4 tetor, do të organizohet një seminar i rëndësishëm në Tiranë, i cili synon të sjellë në vëmendje nevojën për avancimin dhe zbatimin e ligjeve për mirëqenien e kafshëve. Ky aktivitet vjen pas një periudhe 12-vjeçare, gjatë së cilës organizatat dhe institucionet që merren me mbrojtjen e kafshëve kanë hasur vështirësi të mëdha për shkak të moszbatimit të ligjeve aktuale.
Seminari do të mbledhë prokurorë, gjyqtarë, oficerë policie dhe veterinerë të shtetit, me synim forcimin e zbatimit të ligjeve ekzistuese dhe diskutimin e mënyrave për përmirësimin e tyre. Fokusi i diskutimeve do të jetë në koordinimin dhe bashkëpunimin ndërmjet institucioneve shtetërore dhe organizatave që angazhohen për mbrojtjen e kafshëve, si brenda ashtu edhe jashtë vendit. Institucione ndërkombëtare që mbështesin kauzën për mirëqenien e kafshëve janë ftuar gjithashtu të marrin pjesë në këtë ngjarje të rëndësishme.
Konferenca do të moderohet nga Oli Pero, një figurë e njohur për përkushtimin e saj shumëvjeçar në mbrojtjen e kafshëve dhe misionin e saj të përhapur në mediat shqiptare dhe të huaja. Oli, me banim në Montreal/Kanada, do të drejtojë diskutimet duke sjellë perspektiva të reja mbi mbrojtjen e kafshëve dhe përvojën e saj ndërkombëtare në fushën e mirëqenies së tyre.
Ky seminar është një mundësi për të ndarë praktikat më të mira dhe për të krijuar një dialog konstruktiv rreth nevojës për reforma ligjore dhe zbatimin e plotë të tyre për mbrojtjen e kafshëve në Shqipëri dhe më gjerë.
Përgatiti: Blerina Ruka/AMPRESS
