By Nga Shani Pnishi
Toronto-Kanada
Tea Haxhillari është diplomuar për Komerc dhe Kontabilitet në Queens University në Kingston, Ontario. Pas përvojës së saj universitare, ajo pati mundësinë të përfundonte një Master të Dyfishtë në Menaxhim Global (Ivey Business School & London School of Economics). Që nga kthimi i saj në Toronto, Tea ka punuar si agjente e shitblerjes. Në vitin 2020 ajo ka fituar çmimin “Rising Stars”, ndërsa nga viti 2021 klasifikohet në krye të listës për zyrën në të cilën punon. Tea ka studiuar në Angli, Singapor dhe Zvicër, dhe ka punuar me Suzlon Group në Indi dhe Daimler në Angli. Tea është Presidente e njërës prej shoqatave më aktive dhe më domethënëse në komunitetin shqiptar të Kanadasë, RH Scholarship. Për të gjitha këto të arritura dhe aktivitete, ne zhvilluam një intervistë për gazetën “Diaspora Shqiptare”…
Ju keni emigruar në Kanada në moshë të re. Si lidhen kujtimet tua me Shqipërinë?
Isha fare e vogël kur mbërritëm në Kanada. Dhe si rrjedhojë e kësaj, kam fare pak kujtime nga ajo kohë. Gjithsesi kujtimet më të bukura i kam nga vizitat e shpeshta që bëjmë së bashku me familjen në Shqipëri. Sa herë kthehem nga Shqipëria në Kanada vij me përshtypjet e mia më të mira, që më bën të shkoj edhe më shpesh.
Jeni vajza e filantropes, aktivistes dhe biznesmenes së njohur në komunitetin shqiptar në Kanada, Teuta Haxhillari. Me gjithë çfarë shohim, ju po e ndiqni rrugën e saj. Sa ju ka frymëzuar mami për të rrugën tuaj jetësore?
Jo vetëm që ndihem me fat, por edhe e bekuar. Ajo pos si nënë, më ka shërbyer edhe si mentore në karrierën time në biznesin e shitblerjes (Real Estate). Siç edhe e njihni ajo është shembul i shkëlqyer çfarë mund të arrijë një femër, të kesh një karrierë të suksesshme dhe një familje të mrekullushme. Ajo më ka mësuar mbi të gjitha edhe vlerat kombëtare dhe më ka lidhur më shumë me komunitetin shqiptar që nga fëmijëria.
Për arritjet tuaja në biznes jeni në toplistën e sukseseve së bashku me mamin tuaj. Si e vlerësoni këtë arritje?
Për të arritur suksese të mëdha natyrisht duhet një punë dhe angazhim i madh. Ajo që mund të them është se suksesi nuk është rastësi. Është shume punë, këmbëngulje, mësim, studim, sakrificë dhe mbi të gjitha dashuri për atë që po bën. Të gjitha këto i bëj me kënaqësi, andaj sukseset nuk kanë të ndalur.
Sa e ka ndryshuar pandemia COVID-19 mënyrën e të bërit biznes dhe komplet fushën së cilës i takoni?
Jo vetëm puna apo biznesi, por e gjithë jeta jonë ndryshoi. Shumë njerëz kudo në botë u prekën direkt nga sëmundja dhe nga vdekja. Biznesi ynë, nga fillimi i pandemisë e deri më tani është konsideruar si shërbim thelbësor, andaj ne nuk jemi ndalur as edhe një çast. Gjatë gjithë kësaj kohe na është dashur të përballemi mbi të gjitha edhe me pasigurinë e jetës.
Për t’ju përgjigjur pyetjes suaj mund të them me lehtësi se ka pasur ndryshime kyçe në mënyrën e funksionimit të bizndesit, seps ndodhën ndryshime të paparashkuara të tregut. Megjithatë njerëzit kanë nevojë të shesin apo të blejnë pronat e tyre, për arsye të ndryshme. Unë vazhdoj të punoj si më parë, në mos më shumë.
A shkoni në Shqipëri shpesh?
Sa herë më jepet mundësia , më merr malli për njerëz tanë të dashur dhe mikpritës. Për Shqipërinë tonë të bukur, klimën e mrekullushme, per kombinim mahnites , male të larta dhe plazhe e bukura, nuk ka rëndësi se ku je ,vend ëndrrash. pafund thesare arkeologjike, kështjella, trashëgimi të UNESCOS-s dhe histori romake.
Jam duke përfunduar librin “The Ilyrians to the Albanians” i shkruar edhe në anglisht nga profesor Neritan Ceka që do doja ta falënderoja për këtë libër kaq të çmuar që më dhuroi ai në vizitën e fundit që kshim në verën e kaluar në Shqipëri dhe do të dojat’ua rekomandoja të gjithëve veçanërisht bashkëmoshatarëve të mi që janë lindur dhe rritur jashtë Shqipërisë që duan të dinë më shumë për të parët tanë, ilirët.
Ju njohim si presidente e shoqatës RH Scholarship në Toronto…
Shoqata është themeluar nën drejtim e Rej Haxhillarit, i cili vazhdon të japë një kontribut të çmueshëm për shoqatën. Janë të shumta aktivitetet që kemi organizuar dhe vazhdojmë t’i organizojmë së bashku.
Cilat, sipas jush, janë të arriturat e shoqatës nën drejtimin tuaj?
Në fillim do të përmendja ekspozimin e artit impresionist të Dhimiter Prifit. Dhimitri, i cilësuar shpesh si “Van Gogu i Shqipërisë”, pastaj eksopozimin edhe të kostumeve popullore të trashëgimisë së Malësisë së Madhe, Kolonjës, Mirditës dhe Shqipërisë së Mesme. Veshjet popullore janë ëmblema e trashëgimisë sonë. Kostumi i Malësisë se Madhe dhe Xhamadani i Shqipërisë së Mesme që u ekspozuan janë kostumet origjinale 250 vjeçare. Ajo që duhet theksuar është fakti se bëhet fjalë për kostume unike që i përkasin vetëm Shqipërisë (Kostumi i Malësisë së Madhe). Modeli (xhublete) i shfaqur përfaqëson xhubletën reale në qytetin e Tiranës dhe Durrësit. Kostumi i Kolonjes dhe Mirditës janë riprodhime, por kanë ruajtur motive, ngjyra dhe prerje që i bëjnë akoma atraktive dhe interesante. Ndër aktivitetet tjera që do veçoja edhe ekspozimin e librave dhe autorëve shqiptarë në Kanada, ku për herë të parë në Torontou mblodhën rreth 15 autorë që jetojnë dhe shkruajnë në Kanada. Me krenari shqiptare ata prezantuan librat e tyre dhe patën një shkëmbim të ngrohtë me pjesëmarrësit. Me këtë rast dua të theksoj se RH Scholarship i dedikohet promovimit të letërsisë shqipe dhe do të vazhdojë ta mbështesë këtë elitë shkrimtarësh edhe në të ardhmen me botimet e tyre.
Midis tjerash shoqata jep çdo vit dhjetë bursa për studentët shqiptarë në Kanada. Si ndjeheni për këtë?
Nuk ka ndjenjë më të bukur se të kontribuosh në promovim, njohjen, mbështetjen dhe festimin e Ekselencës Shqiptao-Kanadeze të Studenteve në të gjithë komunitetin, të cilët ndajnë përpjekjet për te shtyrë veten drejt përsosmërisë. Sa më shumë që studentët shqiptarë arrijnë lartësi të reja në shoqërinë profesionale kanadeze, aq më e fortë është ndjenja e krenarisë. Të reflektojmë mbi udhëtimin tonë, të frymëzohemi nga bashkëmoshatarët tanë dhe të fuqizojmë brezat që vijnë, të rritemi së bashku dhe të kemi sukses së bashku.
A mund të na tregoni një ditë të zakonshme tuajën?
Çdo ditë është e ndryshme. Takoj njerëz të rinj, shoh vende të reja dhe u përgjigjen nevojave të shumta të blerësve dhe shitësve. Një gjë është e sigurt, nuk është një punë 9 me 5, nga e hëna në të premte. Êshtë 24/7. Është punë e vështirë, kërkon këmbëngulje, sakrificë dhe mbi të gjitha dashuri për atë që po bën.
Nuk ka një ditë të zakonshme për një agjent, por ka një sërë detyrash që i bëj rregullisht, si psh. dokumentet administrative që kërkon puna, takimet me klientët, përgatitjen e shtëpive, planifikimin, vlerësimeve, inspektimin, marketingun dhe shoqërimin e klientëve në mbylljet e pronave.
