By Tuz- Mal i Zi
Hap siparin edicioni i VI i Festivalit Mbarëkombëtar i Folklorit “Rapsha 2022” – Malësi e Madhe, i cili do të mbahet me datat 19, 20 dhe 21 gusht, i organizuar nga shoqata SHKA “Rapsha”. Në Festival do të garojnë 24 ansamble pjesëmarrëse nga të gjitha trevat ku jetojnë shqiptarët (Mali i Zi, Shqipëria, Kosova, Maqedonia e Veriut, Greqia, Italia, Zvicra, SHBA, Bujanovci, Presheva).
Në këtë edicion të Festivalit folklorik, ndër më të organizuarit në trojet shqiptare, pos grupeve nga Malësia, Kosova, Shqipëria, Maqedonia e Veriut dhe Lugina e Preshevës do të jenë edhe dy grupe nga Amerika.
Pas përgatitjeve disa mujore, Tuzi priti mbrëmë mbi 300 artistë shqiptarë nga gjitha trojet etnike dhe diaspora e Amerikës, e cila edhe është mbështetësja kryesore financiare e këtij evenimenti ndër më të organizuarit në tokat shqiptare.
Drejtori i festivalit David M. Juncaj, njëherësh kryetar i SHKA “Rapsha” falenderoi të gjithë pjesëmarrësit dhe theksoi se në programin e festivalit do të shpalosej folklori nga të gjitha trojet etnike shqiptare si dhe diaspora, duke dëshmuar kështu se kombi shqiptar di të ruajë kulturën dhe traditën e vetë, e që Festivali është vendi më i përshtatshëm të pasqyrohet kjo, por edhe të kultivohet te brezat e ri. Përmes trashëgimisë shpirtërore është bërë e mundur që kohërat e vështira të kombit të kthehen në këngë e histori dhe kështu të mbahen gjallë heroizmat e mbarë trojeve tona shqiptare si dhe të ruhet e përcillet nga brezi në brez. Ky festival është identitet dhe fuqi vepruese kulturore. Malësia jonë i pranon dhe nderon të gjithë bashkëkombësit tanë nga trojet shqiptare. Në fund të festivalit, një juri profesionale do të vlerësojë tre nga grupet më të mira.
Përgatiti: Blerina Ruka
