By Montreal, Kanada – Nën pritjen e ngrohtë të Galerie Ambigu, u zhvillua një mbrëmje e veçantë letrare me shkrimtarin e njohur shqiptar Arben Kallamata, i cili për herë të parë u takua me komunitetin shqiptar të Montrealit për të prezantuar veprën e tij letrare.
Me hapjen e kryeredaktores së Albanian Montreal Press, Blerina Ruka, pasditja e së shtunës mblodhi dashamirës të librit, artit dhe kulturës shqiptare në një atmosferë intime dhe reflektuese, ku fjala e shkruar u kthye në urë komunikimi mes autorit dhe lexuesve.
Mbrëmja u moderua nga shkrimtari dhe studiuesi Flurans Ilia, i cili zhvilloi një bisedë të hapur me autorin rreth krijimtarisë së tij, procesit të të shkruarit dhe temave që përshkojnë veprat e tij.
Gjatë takimit, Arben Kallamata prezantoi tre librat e tij më të njohur: “Un Mort”, “Hijet e Muzgut” dhe “Vizita e Fundit”, duke ndarë me të pranishmit histori, kujtime dhe reflektime që kanë shoqëruar lindjen e secilës vepër. Përmes rrëfimeve të tij, publiku pati mundësinë të njihte më nga afër universin krijues të autorit dhe mënyrën se si realiteti, historia dhe përvoja njerëzore gjejnë vend në faqet e librave të tij.
Një nga momentet më interesante të mbrëmjes ishte dialogu i drejtpërdrejtë me publikun. Të pranishmit shtruan pyetje mbi personazhet, temat, frymëzimet dhe mesazhet që përcjell krijimtaria e Kallamatës, duke e kthyer takimin në një bashkëbisedim të gjallë dhe të sinqertë mes autorit dhe lexuesve.
Mbrëmja letrare me Arben Kallamatën dëshmoi edhe një herë interesin e komunitetit shqiptar në Montreal për kulturën dhe letërsinë shqipe, duke sjellë së bashku njerëz që, pavarësisht largësisë nga atdheu, vazhdojnë të ushqejnë lidhjen e tyre me gjuhën, librin dhe identitetin kulturor shqiptar.
Në një kohë kur ritmi i përditshmërisë shpesh e largon njeriun nga reflektimi, takime të tilla rikujtojnë se libri dhe arti i fjalës së bukur mbeten ndër urat më të forta që na bashkojnë.
