Asnjë kandidat për president, dështon raundi i parë për kreun e shtetit në Shqipëri

Tiranë- Shqipëri
Raundi i parë i votimit për presidentin e ri të vendit duket se ka dështuar, pasi ora 16:00 e kësaj të diele ishte afati i fundit për dorëzimin e propozimeve.
Të hënën do të zhvillohet në Parlament seanca e parë e votimit për zgjedhjen e Presidentit të ri të Republikës. Procesi pritet të jetë formal, pasi në Kuvend nuk është dorëzuar asnjë kandidaturë për postin më të lartë të shtetit.
Ndërkohë sot mbaron afati i vendosur për dorëzimin e emrave në zyrat e Parlamentit. Gjithë vëmendja tani do të përqendrohet në 23 maj, atëherë kur do të zhvillohet seanca e dytë për këtë qëllim.
Seanca e parë për votimin e Presidentit të Ri të Republikës është parashikuar të mbahet pasditen e së hënës, ndërsa palët duken ende shumë larg konsensusit.
Pavarësisht lakimeve nga politika për një president konsensual, deri më tani mazhoranca dhe opozita ende nuk kanë gjetur një konsensus për emrin e kandidatit.
Për zgjedhjen e kreut të Shtetit, Kushtetuta ka parashikuar pesë raunde votimi. Në tre të parat nevojitet një shumicë prej tre të pestash, ndërsa në dy raundet e fundit presidenti zgjidhet me shumicë të thjeshtë.