By Anëtarë të Këshillit Koordinues të Diasporës dhe Kryesia e Dhomës së Biznesit të Diasporës Shqiptare zhvilluan ditën e djeshme një takim me Presidentin e Republikës së Shqipërisë z. Bajram Begaj. Në fokus të takimit ishte Diaspora dhe roli i saj i rëndësishëm në zhvillimin e vendit.
Gjatë takimit u shkëmbyen mendime mbi forcimin e lidhjeve të shqiptarëve kudo që ndodhen, dhe fuqizimin e rolit dhe kontributit të Diasporës në vendlindje.
Anëtarët e Këshillit Koordinues të Diasporës, duke e uruar për marrjen e detyrës, shprehën gatishmërinë për të bashkëpunuar me Presidentin Begaj në interes të afrimit të mëtejshëm të marrëdhënieve institucionale me Diasporën shqiptare.
Pjesë e bisedës ishte edhe Vota e Diasporës si edhe mbledhja vjetore e KKD e cila do të mbahet në datën 18 dhjetor, dita kombëtare e Diasporës Shqiptare.
Kreu i Shtetit vlerësoi rolin e anëtarëve të Këshillit Koordinues të Diasporës në bashkëpunimin dhe angazhimin e vazhdueshëm për çështjet që kanë të bëjnë me përfaqësimin e interesave të shqiptarëve të larguar nga vendlindja dhe forcimin e marrëdhënieve me vendin e origjinës, duke siguruar mbështetjen e tij në nxitjen e mëtejshme të këtij bashkëpunimi.
Së bashku me përfaqësuesit e KKD-së Z.Lazim Destani, z. Ardian Lekaj, znj. Anila Hyka, znj, Brikena Muharremi, znj. Adriana Bejko në këtë takim ishin edhe z. Lavdrim Krashi, Kryetar i Nën Komisionit për Diasporën dhe Migracionin, dhe znj. Sonila Hysi, Drejtoreshë Ekzekutive e Agjencisë Kombëtare të Diasporës.
