By Në një intervistë për Albanian Montreal Press, Anaida do të na tregojë më shumë për jetën, sfidat dhe planet e të ardhmes.
Nga Blerina Ruka
Anaida Deti së bashku më familjen u zhvendosën nga Shqipëria në Kanada 20 vitë më parë. Ishtë një ëndërr e madhe që e bëri Anaidën të ndërmerrte këtë iniciativë për të ndryshuar kryekëput jetën e saj. Vështirësitë e fillimit, pengesat jo fort të kollajta, gjuha, shok-u kulturor e shumë të tjera ishin një sfidë e përditshmërisë në vitet e para. Edhe pse nënë e dy fëmijëve, ajo ishte e qartë që me punën dhe përkushtimin e duhur do të mund të ishte çdo ditë një hap afër realizimit.
Në vitin 2013, pas marrjes së licencës, Anaida themeloi klinikën dentare DentalX. As ajo vetë se kish menduar se i gjithë përkushtimi do ta çonte drejt kopertinave të revistave më të famshme të fushës së stomatolgjisë por edhe biznesit, lektore mbi kujdesin oral në mjaft media kanadeze si dhe rradhit 32 trofe e certifikata që vulosin profesionalizmin e saj, anën humane dhe modelin e gruas.
Fillimet e emigrimit janë një luftë për këdo që ka pranuar sfidat e integrimit në një vend të huaj. Po ju çfarë mbani mend nga fillimet tuaja?
Rrugëtimi ka qenë pa diskutim mjaft i vështirë. Unë kam ardhur në Kanada në vitin 2002, pasi kisha jetuar 5 vjet në Itali.
Në Itali vazhdoja Universitetin Dentar. Kur erdha në Kanada, shkolla nuk njihej fare dhe më është dashur të filloj çdo gjë nga e para. Anglishten e flisja shumë pak, kishim mësuar në shkollë por nuk e kishim praktikuar, ishte shumë bazike dhe për t’u kuptuar ishte shumë e vështirë nga theksi që njerëzit kishin këtu. Fillova të mësoja anglishten (ESL), mora diplomën e gjimnazit dhe pastaj hyra në College për asistente dentiste. Punova një vit e gjysmë, po doja të beja diçka më tepër, nuk isha akoma e kënaqur plotësisht dhe prandaj vendosa t’i rikthehesha studimeve. Vazhdoja College për higjeniste dentare e cila zgjati dy vjet. Tani kam mbi 10 vjet që jam diplomuar dhe kam licensën shtetërore.
Mbas dy vjetesh që punova për klinika të ndryshme dentare, vendosa të hap diçka timen. Në fillim kam ndarë hapësirën me profesioniste të tjerë dentarë në 3 klinika të ndryshme. Klinikën time e kam hapur në maj të vitit 2016, pas 9 muajsh kërkimi. Fillimi si gjithmonë ishte shumë i vështirë, mezi prisja të binte telefoni e të hapej dera. Sot jam shumë e kënaqur, biznesi ecën shumë mirë dhe kemi mbi 3,000 pacientë që trajtojmë në klinikë. Unë kam një pasion shumë të madh për punën që bëj dhe kjo ka qenë shumë e lehtë të transferohej tek stafi dhe pacientët. Për mua nuk është vetëm një punë dhe një biznes, po është një pasion shumë i madh.
Sfidat kanë qenë të shumta, duke filluar që nga gjuha, pastaj nga shkolla qe nuk njihej fare dhe çdo gjë duhet të fillohej nga zero. Më është dashur të shkoj në shkollë e të punoj pas shkolle. Ditë të gjata e të lodhshme.
Klinika “DentalX” histori e padiskutueshme suksesi, a ka projekte te reja?
Jam në procesin e hapjes së klinikës së dytë në zonën e Etobicoke, që do të jetë përafërsisht në pranverën e 2022. Shpresoj në të ardhmen të hap edhe të tjera filiale.
Përveç kësaj, kam edhe disa plane në media të ndryshme, dy kopertina të tjera së shpejti, njëra për një revistë kanadeze dhe tjetra për një revistë private amerikane. Pastaj kam dhe plane të tjera, në radio dhe television, po nuk dua të zbuloj shumë se jam pak supersticioze. Më kanë nominuar në disa çmime dhe pres të më akordohen, jam shumë entuziaste për to.
Ju keni krijuar një ekip femrash që zhvillojnë klinikën tuaj, sipas jush a është ky shekulli i gruas?
Sfidë tjetër ishte të jesh mama dhe të mirëmbash një biznes. Ndërkohë që shkoja në shkollë dhe punoja, kisha dhe djalin shumë të vogël dhe shumë herë isha pa gjumë dhe me duhej të vazhdoja me ditën edhe pse pa pushuar fare. Kur linda vajzën, pas tre ditesh më është dashur të kthehem në punë. Eshtë mjaft e vështirë të menaxhosh familjen dhe biznesin në të njëjtën kohë. Kur ke biznes, po puna nuk mbaron kurrë edhe kur je jashtë klinikës.
Une jam pak feministe nga natyra dhe besoj shumë në fuqinë e gruas. Besoj që ne të gjitha mund të ndryshojmë botën. Jo pa qëllim Zoti na e ka dhënë ne mundësinë për t’u bërë nëna. Unë besoj që gratë mbartin një forcë të jashtëzakonshme. Ne mund të bëjmë shumë gjëra në të njëjtën kohë, që e bën akoma edhe më të veçantë dhuntinë tonë. Gratë nuk e kanë të lehtë, duhet të kujdesen për familjen, shtëpinë dhe biznesin që nuk është e lehtë të bëhet, edhe pse ne e bëjmë të duket shumë e thjeshtë.
Njoh shembuj të jashtëzakonshëm të grave të forta e të palodhura në jetën time, duke filluar nga mamaja ime dhe vjerra ime, qe më kanë treguar që gratë mund të bëjnë gjithçka. Gratë duhet të duan dhe të ndihmojnë njëra-tjetrën.
Jo rrallë herë jeni pjesë e kopertinave kanadeze dhe amerikane. Çfare do të thotë për ju kur renditeni ndër njerëzit më me influencë për të qenë lider biznesi në Amerikën Veriore?
Eshtë një kënaqësi shumë e madhe për mua dhe për familjen time dhe jam shumë krenare për këtë. Unë gjithmonë jam munduar të punoj shumë. Historia ime është konsideruar “histori suksesi” dhe për këtë kam fituar shumë çmime lokale, kombëtare dhe ndërkombëtare.
Si po e përjetoni ju periudhën e pandemisë? Frikë apo kujdes?
Si çdo biznes në këtë kohë të vështirë, edhe biznesi im ka qenë i prekur nga pandemia edhe pse ndoshta më pak se të tjerët sepse ne quhemi esencialë. Në këtë periudhë ne dukemi pak më ndryshe se përpara, sepse jemi të mbuluar nga koka të këmbët dhe vetëm sytë na duken. Gjatë verës ishte shumë e vështirë nga vapa, po tani pak më mirë me ftohjen e motit. Sot për sot ka më pak pacientë se më parë, për shkak se duhet të kemi një numër të kufizuar njerëzish brenda në klinikë. Kemi bërë disa ndryshime në klinikë për të plotësuar kërkesat e Kolegjit të Ontarios. Nëse pacientët ose ndonjë familjar i tyre i ekspozur, ka shenja prekjeje nga virusi, takimi me dentistin rimerret dy javë më vonë. Ne jemi mësuar me sëmundje të ndryshme dhe përshtatshmëria ishte e menjëhershme. Për mua është më shumë kujdes, jo frikë, sidomos duhet të kujdesemi për moshat e treta që na rrethojnë.
Klinika Dentare DentalX
Klinika Dentare DentalX ofron nivele të përballueshme mbi kujdesit shëndetësor oral dhe mundësitë më të mira të trajtimit dentar në North York, Toronto. Stafi i stomatologëve dhe profesionistëve të dhëmbëve, flasin gjuhën tuaj duke përfshirë anglisht, spanjisht, shqip dhe më shumë. Qëllimi i DentalX është që çdo vizitë në klinikën të jetë një përvojë pozitive të gjithanshme, DentalX kërkon që të gjithë pacientët të largohen me një buzëqeshje të freskët dhe të shëndetshme.
