By Në largim të vitit 2022, AMPress futet në vitin e saj të 6 të informimit të shqiptarëve në Kanada dhe më gjerë. Albanian Montreal Press duke qenë një portal informativ me përmbajtje aktuale dhe sociale i drejtohet kryesisht, por jo vetëm, komunitetit shqiptar të përqendruar në Kanada.
AMPress është një alternativë që rreket të krijojë një hapësirë për njohjen e mjaft ngjarjeve me përmbajtje komunitare. Si një dritare e fjalës dhe e prezantimit, objektivi kryesor mbetet kontributi për sensibilizimin e njohjes së emrave të suksesshëm shqiptarë apo njohjen e realitetit të jetës në mërgim. Në përcjelljen e lajmit, intervistës, profilit, njoftimit apo aktiviteteve komunitare, mjaft ngjarje janë vënë në qendër të vëmendjes apo u janë bërë me dije lexuesit të të gjitha provincave përgjatë vitit 2022.
Veprimtari shqiptarësh, promovime, njohje personazhesh, biznesesh, ngjarje kulturore, sociale, ekonomike, e mjaft të tjera kanë përcjellë dinamikën e AMPress gjatë këtij viti. Duke iu përmbajtur autonomisë, në mbështetje të kauzave, profesioneve, suksesesve apo aktualitetit, në një mënyrë apo tjetër AMPress i është dedikuar më shumë se një teme. E lidhur ngushtësisht me shqiptarët, ata mbeten aleatët kryesore të trasnmetimit të fjalës.
2022 ishtë viti i parë pas kalimit të pandemisë globale COVID-19, e cila sigurisht nuk mund të linte pa prekur edhe aktivitetet komunitare shqiptare, deri në përfundim të së cilës, realizimi i tyre ka qenë nëpërmjet platformave online; Zoom apo Teams.
Vlen të theksohet bashkëpunimi i herëpashershëm me bashkësitë e shqiptarëve në pjesën më të madhe të provincave në Kanada ( The Albanian Association of Montreal – Quebec, Shoqata e Bashkwsisw Shqiptaro- Kanadeze në Toronto, Albanian-Canadian Association ILLYRIA nw Halifax, Albanian-Canadian Association of Calgary etj, apo organizmat me bazë profesionale ( Albanian Canadian Lawyers Association (ACLA), në Ontario, apo RH Scholarship në Toronto, të cilat jo pak kanë qenë burim informacioni dhe larmi veprimtarish.
Në këtë vit plot me zhvillime të vrullshme, vlen që të veçoj botimin special, Gazetën AMPress e cila u prezantua përpara shqiptarëve të Montrealit duke bërë bashkë mjaft personalitete shqiptare, bashkatdhetarë dhe të ftuar nga Toronto dhe Montreali. Në gazetën prej 12 faqesh u prezantuan 10 shqiptarë që kanë bërë emër në komunitetin tonë të përqendruar në Kanada, por jo vetëm. Ata janë shqiptarë me histori suksesi në fusha të ndryshme, si në financë, në drejtësi, në biznes, në teknologji, në mjekësi, art e kulturë. Është folur, shkruar e rrëfyer për gjithë rrugëtimin e tyre jo fort të lehtë duke dalë në pah sesi këmbëngulja, vullneti dhe pasioni u ka dhënë fatin të jenë sipërmarrës, profesionistë apo mbështetje orientimin edhe për pjesën tjetër të komunitetit. Me një përmbajtje me personazhe shqiptarë nga e gjithë Kanadaja, Gazeta AMPress mori dhe vëmendje jashtë vendit.
Me shpresë se Viti i Ri 2023 do jetë më i frytshëm dhe më i mbarë për të gjithë shqiptarët, bashkëpunimi do të jetë gjithherë i mirëpritur!
