By 
Kryetari i Partisë Demokratike, Sali Berisha, zhvilloi një takim me përfaqësues dhe anëtarë të komunitetit shqiptaro-amerikan në New Jersey, ku vlerësoi rolin historik të diasporës shqiptare në Shtetet e Bashkuara në zhvillimet politike dhe kombëtare të shqiptarëve.
Gjatë fjalës së tij, Berisha iu rikthye vizitës së parë në Shtetet e Bashkuara, në mars të vitit 1991, të cilën e cilësoi si një nga udhëtimet më emocionale të jetës së tij.
“Emocionet vërshonin nga kënaqësia se unë po udhëtoja në drejtimin e duhur, pas dekadash që vendi im kishte humbur drejtimin. Kënaqësia ime e jashtëzakonshme ishte se po takoja ju, zërin e pamposhtur të shqiptarëve në liri”, u shpreh Berisha para të pranishmëve.
Kreu i Partisë Demokratike theksoi veçanërisht kontributin e brezave të mëparshëm të diasporës shqiptare në SHBA, duke e lidhur atë me përpjekjet për rrëzimin e diktaturës komuniste në Shqipëri dhe me mbështetjen për lirinë dhe pavarësinë e Kosovës.
Sipas Berishës, gjatë viteve ai ka pasur mundësinë të takojë përfaqësues të një brezi të diasporës që, përmes angazhimit politik, atdhetar dhe kombëtar, luajti një rol të rëndësishëm në mbështetjen e çështjes shqiptare.
“Fati i madh imi ishte se takova atë plejadë të diasporës shqiptare, e cila me atdhetarinë e saj, me idealet demokratike dhe me idealet kombëtare, dha një kontribut të jashtëzakonshëm në përmbysjen e diktaturës komuniste në Shqipëri dhe luftoi me të gjitha mjetet për lirinë e Kosovës”, deklaroi ai.
Berisha e cilësoi takimin me shqiptarët e New Jersey-t dhe pasardhësit e brezave të mëparshëm të emigracionit si një moment me rëndësi të veçantë për të.
“Diaspora shqiptare në Shtetet e Bashkuara është fati i bardhë, fati i mirë i kombit shqiptar”, përfundoi kreu i Partisë Demokratike.
