By E gjithë salla në këmbë për Reshat Arbanën, për Roza Anagnostin, për të gjithë ata që kanë shkruar historinë e kinematografisë me dinjitet, edhe atëherë kur të krijoje ishte e vështirë të dilje jashtë kornizave të një arti të veshur me ide të realizmit socialist.
Duartrokitjet vijuan gjatë në ceremoninë e hapjes së Festivalit Kombëtar të Filmit Shqiptar edhe për ata që nuk i kemi më, për Xhevdet Ferrin apo Gjergj Xhuvanin, filmi i të cilit ishte sipari i këtij edicioni të 14-të.
Festivali Kombëtar i Filmit Shqiptar premton rreth 200 produksione kinematografike gjatë këtyre dhjetë ditëve.
39 filma janë në garën për filmin e gjatë, por shumë të tjerë në garën e dokumentarit apo filmit të shkurtër.
Brezi i ri nuk di asgjë për kinematografinë tonë dhe është detyra jonë t’i tregojmë që kemi një kinematografi me të cilën mund të krenohen.”, tha Ilir Butka, drejtor artistik i festivalit.
Në qendër të mbrëmjes ishin disa nga figurat ikonike të kinematografisë shqiptare, të vlerësuara me çmime karriere. Disa prej tyre i morën vetë trofetë, ndërsa për të tjerë çmimi u prit nga familjarët, në një natë ku mungesa e artistëve të ndarë nga jeta u ndje po aq sa prania e tyre.
“Do doja që Dhimitrin ta kisha në krah këtë moment. Ky çmim është vlerësim jo vetëm për mua, por edhe për të, për bashkëshortin tim, për bashkëpunëtorin tim në një jetë të gjatë.”, tha aktorja Roza Anagnosti.
“Ky çmim është një vlerësim shumë i madh për Kristaqin dhe një nder për familjen tonë. E ndaj me të gjithë ata që e deshën, e vlerësuan dhe bashkëpunuan me të.”, tha gruaja e regjisorit Kristaq Mitro.
Përballë kësaj trashëgimie, mesazhi i institucioneve ishte se rikthimi i festivalit duhet të shoqërohet edhe me një ndryshim të mënyrës se si mbështetet industria e filmit.
“Shqipëria e meriton të ketë një kinema të denjë dhe sot është momenti i duhur. E kemi nisur këtë hap.”, tha kryetari i QKK-së, Jonid Jorgji.
