By NEW YORK – Moda, arti dhe humanizmi do të bashkohen në zemër të New York-ut në një mbrëmje të veçantë kushtuar jetës. Stilistja shqiptare Mirela Nurçe, në bashkëpunim me organizatën Albanians Fighting Cancer USA (AFC), do të organizojë më 26 shtator 2026 një sfilatë humanitare, të ardhurat e së cilës do të shkojnë në mbështetje të Spitalit “Ihsan Çabej” në Lushnjë.
Eventi do të zhvillohet në ambientet e studios së fotografit shqiptar me famë ndërkombëtare Fadil Berisha, në New York, duke bashkuar përfaqësues të komunitetit shqiptar, artdashës dhe mbështetës të kauzave humanitare.
Talenti i Mirela Nurçes në shërbim të një kauze jetike
Përmes kësaj nisme, Mirela Nurçe ka vendosur që artin dhe punën e saj t’ia kushtojë një qëllimi që prek drejtpërdrejt jetën e foshnjave të porsalindura.
100% e të ardhurave nga veshjet e realizuara dhe të shitura në kuadër të kësaj nisme do t’i kalojnë Albanians Fighting Cancer USA, për të mbështetur projektin për sigurimin e një inkubatori të ri për Spitalin e Lushnjës, qyteti i lindjes së stilistes.
Nisma vjen pas një fushate ku 69 donatorë kanë kontribuar deri tani me 10,000 dollarë. Objektivi i radhës është dyfishimi i kësaj shume dhe realizimi i plotë i projektit.
Një inkubator që mund të ndryshojë realitetin për nënat dhe foshnjat
Sigurimi i inkubatorit të ri do të kishte një ndikim të drejtpërdrejtë për familjet e zonës. Sipas organizatorëve, foshnjat që kanë nevojë për kujdes në inkubator aktualisht mund të detyrohen të transferohen drejt Spitalit të Fierit.
Pajisja e Spitalit të Lushnjës me inkubatorin e ri synon t’u mundësojë të porsalindurve të marrin kujdesin e nevojshëm në qytetin e tyre, pranë nënave dhe familjeve.
Në këtë mënyrë, një veshje e krijuar në atelierin e një stilisteje shqiptare shndërrohet në shumë më tepër sesa modë: në kujdes, shpresë dhe mundësi për jetë.
Diaspora shqiptare bashkohet për Lushnjën
Sfilata është një tjetër shembull i fuqisë së komunitetit shqiptar në Amerikën e Veriut për t’u organizuar rreth kauzave që lidhen me vendlindjen.
Nga talenti i Mirela Nurçes, te angazhimi i Albanians Fighting Cancer USA dhe mikpritja në studion e Fadil Berishës, iniciativa sjell së bashku shqiptarë që kanë ndërtuar karrierën dhe jetën e tyre në Shtetet e Bashkuara, por vazhdojnë të kontribuojnë për komunitetet në Shqipëri.
Publiku do të ketë mundësinë jo vetëm të marrë pjesë në sfilatë, por edhe të mbështesë drejtpërdrejt kauzën përmes porosive të krijimeve të Mirela Nurçes.
Sfilata Humanitare – Mirela Nurçe & Albanians Fighting Cancer USA
📍 Fadil Berisha Studio, 603 W 44th St, 3rd Floor, New York, NY 10036
📅 E shtunë, 26 shtator 2026
🕔 Ora 17:00
Një mbrëmje ku pasarela nuk do të jetë vetëm skena e modës, por edhe një urë solidariteti mes diasporës shqiptare dhe vendlindjes.
