By Të nderuara motra dhe të nderuar vëllezër të besimit bektashi,
Si shqiptar, si vëlla në besim me ju mbi bazën e Kalimës, po ju drejtohem sot me një thirrje:
Ka ardhur koha që ju të merrni në dorë fatet e urdhrit tuaj, përpara se të jetë shumë vonë!
Lajmet për përparimin e projektit famëkeq të të ashtuquajturit “Shtet Bektashi”, një aventurë shkatërrimtare, copëtuese dhe jashtëzakonisht përçarëse ndër ne, janë një kambanë e tmerrshme alarmi.
Zbatimi i këtij projekti na kanos me shpejtësi drejt zhbërjes së thesarit të madh të kombit tonë: harmonisë fetare.
Ky projekt nuk rrezikon vetëm marrëdhëniet mes komuniteteve tona fetare. Ai rrezikon të mbjellë farën e ndarjes mes vetë shqiptarëve. Sot flitet për një “shtet” mbi baza fetare. Po nesër? Çfarë precedentësh po krijojmë? Çfarë mesazhi po u lëmë brezave që do të vijnë?
Shqipëria është copëtuar mjaftueshëm gjatë historisë së saj. Kemi humbur troje, kemi humbur njerëz, kemi kaluar diktatura, përçarje dhe dhimbje të panumërta. A do të lejojmë tani që të krijohen ndarje të reja, këtë herë në emër të besimit?
Ne, shqiptarët, kemi qenë gjithmonë krenarë që kemi ndërtuar një model unik të bashkëjetesës fetare. Ky është një nga thesaret më të mëdha që u kemi lënë trashëgimi fëmijëve tanë. Nuk kemi të drejtë ta shkatërrojmë.
Ndaj, motra dhe vëllezër bektashinj, askush më shumë se ju nuk ka autoritetin moral për ta ndalur këtë marrëzi. Askush më shumë se ju nuk ka detyrimin për të mbrojtur historinë, traditën dhe dinjitetin e urdhrit tuaj.
Ka ardhur koha ta ndaloni këtë paudhësi.
Merrni në dorë frenat e urdhrit tuaj dhe distancohuni nga e keqja që e ka kapluar.
Përpara se të jetë shumë vonë…
