By Nga Edlira Çini
Për 12 vite me radhë, “Marlee’s Got Talent” ka qenë shumë më tepër se një festival artistik për fëmijë. Është një aktivitet që ka në qendër jo vetëm artin, por mbi të gjitha bashkimin, pranimin dhe ruajtjen e identitetit shqiptar tek brezi i ri.
Në këtë festival, vendin primar nuk e zë talenti apo konkurrenca, por inklusiviteti. Çdo fëmijë pranohet dhe mirëpritet me dashuri, pavarësisht nivelit artistik apo eksperiencës së tij. Qëllimi kryesor është që fëmijët të mbajnë gjallë gjuhën shqipe, kulturën dhe traditat tona, ndërsa afrohen më shumë me njëri-tjetrin dhe rriten me ndjenjën e komunitetit.
Edicioni i këtij viti mblodhi mbi 60 fëmijë, të cilët sollën në skenë këngë, valle tradicionale, recitime, interpretime në piano dhe violinë. Ishte një mbrëmje e mbushur me emocione të forta, ku publiku shpesh u përlot jo vetëm nga performancat artistike, por nga bukuria e të parit të kaq shumë fëmijëve shqiptarë veshur me kostumet tona popullire, të bashkuar në një skenë.
Pas këtij organizimi të jashtëzakonshëm qëndron puna e palodhur dhe përkushtimi i Ina Kocaqi Xoxës dhe familjes së saj, e cila prej vitesh vazhdon të krijojë një ambient ku çdo fëmijë ndihet i vlerësuar, i pranuar dhe krenar për origjinën e tij. Me shumë dashuri dhe durim, ajo ka kthyer “Marlee’s Got Talent” në një traditë të rëndësishme për komunitetin shqiptar në Toronto.
Ky festival është një dëshmi e bukur se arti dhe kultura kanë fuqinë të mbajnë pranë brezat dhe të forcojnë identitetin shqiptar larg atdheut. Sepse kur fëmijët këndojnë shqip, kërcejnë vallet tona dhe ndajnë skenën me njëri-tjetrin, ata nuk po japin vetëm një shfaqje, ata po mbajnë gjallë shpirtin shqiptar.
