ᴇʀᴍᴏɴᴇʟᴀ ᴊᴀʜᴏ ɴᴅᴇʀᴏʜᴇᴛ ɴɢᴀ ꜰʀᴀɴᴄᴀ ᴍᴇ ᴛɪᴛᴜʟʟɪɴ ᴘʀᴇꜱᴛɪɢᴊɪᴏᴢ “ᴄʜᴇᴠᴀʟɪᴇʀ ᴅᴇꜱ ᴀʀᴛꜱ ᴇᴛ ᴅᴇꜱ ʟᴇᴛᴛʀᴇꜱ”

Sopranoja shqiptare me famë ndërkombëtare, Ermonela Jaho, është nderuar nga Franca me titullin prestigjioz “Chevalier des Arts et des Lettres”, një nga dekoratat më të larta që akordohet për kontribut të jashtëzakonshëm në art dhe kulturë.

Lajmin e ka bërë të ditur vetë artistja përmes një mesazhi emocionues, ku e cilësoi këtë vlerësim si një nga momentet më të veçanta të jetës dhe karrierës së saj artistike.

“Nderimi me titullin ‘Chevalier des Arts et des Lettres’ është për mua një emocion i jashtëzakonshëm dhe një nder shumë i çmuar për zemrën time, pasi Franca përfaqëson për mua dashurinë për artin, kulturën dhe të vërtetën njerëzore,” – u shpreh Jaho.

Artistja shqiptare shprehu mirënjohjen e saj për të gjithë ata që kanë qenë pjesë e rrugëtimit të saj ndër vite, duke falënderuar veçanërisht agjentin e saj Dominique Riber për mbështetjen dhe besimin e vazhdueshëm, si dhe Jean-Philippe Thiellay për përkushtimin ndaj operës dhe mbështetjen në realizimin e këtij momenti të rëndësishëm.

Ceremonia e ndarjes së titullit u zhvillua në një atmosferë të veçantë artistike, mes miqsh, dashamirësish të artit dhe publikut që ka ndjekur ndër vite karrierën e sopranos shqiptare.

“E pranoj këtë vlerësim me përulësi, mirënjohje dhe emocion të thellë. Faleminderit Francë që e prite zërin dhe zemrën time me kaq bujari,” – përfundoi ajo.

Ermonela Jaho konsiderohet sot një nga sopranot më të vlerësuara në skenën ndërkombëtare të operës, me interpretime në teatro prestigjioze si Royal Opera House, Metropolitan Opera dhe Teatro alla Scala