By Zeqirja Rexhepi, piktori shqiptaro-kanadez rikthehet në vendlindje me ekspozitën “Retrospektivë” – një urë shpirtërore mes Kosovës dhe Kanadasë
Gjilan, Kosovë – Në një atmosferë të ngrohtë e të mbushur me emocione, është hapur në Galerinë e Arteve të Gjilanit ekspozita “Retrospektivë” e piktorit të njohur shqiptaro-kanadez, Zeqirja Rexhepi. Kjo ekspozitë shënon një rikthim simbolik në atdhe, pas më shumë se dy dekadash të largimit nga Kosova për shkak të luftës, dhe përkon me dy përvjetorë të rëndësishëm: 70-vjetorin e lindjes dhe 45-vjetorin e krijimtarisë së tij artistike.
Me veprat e ekspozuara, Rexhepi sjell për publikun një rrëfim të thellë shpirtëror mbi udhëtimin e tij jetësor dhe artistik, të ndarë mes Kosovës dhe Kanadasë. Peneli i tij shpalos jo vetëm dhimbjen dhe ankthin e një gjenerate të shpërngulur, por edhe shpresën, qëndresën dhe dashurinë e pashuar për vendlindjen.
“Jam thellësisht i emocionuar dhe krenar. Kjo ekspozitë është një rikthim në rrënjë, një përqafim me vendin që më rriti dhe më frymëzoi,” u shpreh artisti Rexhepi në hapje të ekspozitës. “Falë artit, ndjej se kurrë nuk u largova vërtet nga Kosova.”
Kuratori i ekspozitës, prof. Avni Behluli, vlerësoi rrugëtimin artistik të Rexhepit, duke theksuar se veprat e tij përçojnë vlera të forta kombëtare dhe kulturore, duke lënë gjurmë në Kosovë, rajon, Kanada dhe më gjerë. “Ai është dëshmi e gjallë e kontributit të diasporës sonë në artin bashkëkohor,” tha Behluli.
Nënkryetarja e Komunës së Gjilanit, znj. Leonora Morina Bunjaku, vlerësoi ekspozitën si një ngjarje kulturore me rëndësi të veçantë për qytetin: “Përmes kësaj ekspozite, Gjilani ndjehet më afër Kanadasë, falë artit që nuk njeh kufij. Zeqirja Rexhepi mbetet një ambasador i vërtetë i kulturës shqiptare në botë.”
Ndërkaq, zëvendësministrja e Punëve të Jashtme dhe Diasporës, znj. Liza Gashi, falënderoi artistin për përfaqësimin e denjë të shqiptarëve në diasporë dhe rolin e tij në ruajtjen e identitetit përmes artit.
Ekspozita “Retrospektivë”, e cila do të qëndrojë e hapur deri më 28 korrik, përfshin piktura dhe vizatime të krijuara ndër vite, që pasqyrojnë zhvillimin artistik dhe emocional të Rexhepit, si dhe historinë kolektive të shqiptarëve në mërgatë.
Në këtë përvjetor të dyfishtë, Zeqirja Rexhepi sjell me vete nga Kanadaja jo vetëm krijimet e tij artistike, por edhe emocionet e një artisti që nuk e harroi kurrë vendin e tij, duke ndërtuar me ngjyrat dhe penelin një urë të fortë shpirtërore mes dy brigjeve të jetës së tij: Kosovës dhe Kanadasë.
