By Në një kohë kur komunitetet në diasporë kërkojnë gjithnjë e më shumë mënyra për t’u lidhur, për të ndarë përvoja dhe për të ndërtuar ura bashkëpunimi, Albanian Professionals Networking Event rikthehet këtë vit në Vancouver me një vizion të qartë: fuqizimin e profesionistëve shqiptarë në Kanada.
Nën drejtimin e Amarildo Cekës, Drejtor Ekzekutiv i Albanian Canadian Society for Social and Economic Progress (ACSEP) dhe organizator i këtij aktiviteti, eventi është shndërruar në një platformë të rëndësishme rrjetëzimi, mentorimi dhe bashkëpunimi ndërmjet profesionistëve shqiptarë në mbarë vendin.
Në këtë intervistë, Ceka ndan vizionin, objektivat dhe risitë e edicionit të këtij viti, duke theksuar rëndësinë e ndërtimit të një komuniteti të lidhur, aktiv dhe me ndikim.
Çfarë përfaqëson ky event dhe pse është i rëndësishëm për komunitetin shqiptar në Kanada?
Ky event është mbi gjithçka një hapësirë takimi. Albanian Professionals Networking Event synon të mbledhë profesionistë shqiptarë nga fusha të ndryshme – shëndetësi, drejtësi, akademi, biznes, teknologji, shërbim publik dhe sipërmarrje për të ndërtuar lidhje reale, për të ndarë përvoja dhe për të forcuar një ndjenjë të përbashkët identiteti dhe bashkëpunimi.
Në një vend si Kanadaja, ku diaspora jonë është shumë aktive por shpesh e shpërndarë, ky lloj rrjetëzimi është thelbësor.
Çfarë e dallon këtë event nga takimet e tjera profesionale apo komunitare?
Ajo që e dallon është qëllimi i qartë dhe fryma komunitare. Ky event është kthyer në një platformë ku njerëzit ndihen të përfaqësuar, të dëgjuar dhe të inkurajuar.
I jepet rëndësi dialogut ndërbrezor, mentorimit dhe ndërtimit të bashkëpunimeve afatgjata. Për më tepër, eventi ndërthur profesionalizmin me krenarinë kulturore, duke reflektuar rrugët e ndryshme të suksesit të shqiptarëve në Kanada.
Kujt i drejtohet ky aktivitet? A është vetëm për profesionistë të konsoliduar?
Absolutisht jo. Eventi është i hapur për të gjithë: studentë, profesionistë në fillimet e karrierës, liderë të konsoliduar, sipërmarrës dhe individë që janë ende në kërkim të drejtimit të tyre profesional.
Një nga objektivat kryesore është krijimi i urave mes brezave, në mënyrë që përvoja të ndahet dhe të rinjtë të kenë modele dhe mbështetje konkrete.
Çfarë mesazhi përcillet përmes këtij eventi?
Mesazhi është i thjeshtë por i fuqishëm: jemi më të fortë kur jemi të lidhur.
Komuniteti shqiptar ka një potencial të jashtëzakonshëm njerëzor dhe profesional. Duke bashkëpunuar dhe duke mbështetur njëri-tjetrin, forcojmë jo vetëm pozitën tonë individuale, por edhe kontributin tonë në shoqërinë kanadeze.
Këtë vit, do t’u jepet hapësirë edhe artistëve lokalë dhe atyre në ngritje për të performuar gjatë eventit, duke promovuar talentin shqiptar dhe duke krijuar një atmosferë që reflekton kreativitetin dhe diversitetin e komunitetit.
A është ky event pjesë e një nisme më të gjerë kombëtare?
Po, padyshim. Takimi në Vancouver është pjesë e një vizioni pan-kanadez për ndërtimin e një rrjeti të qëndrueshëm dhe me ndikim të profesionistëve shqiptarë në mbarë Kanadanë.
Pas suksesit të eventeve të mëparshme, përfshirë atë në Calgary, është konfirmuar nevoja për krijimin e hapësirave të tilla në qytete të ndryshme. Qëllimi është forcimi i bashkëpunimit mes komuniteteve lokale, nxitja e mentorimit dhe ndërtimi i lidershipit ndërbrezor.
Çfarë pritet nga edicioni i këtij viti në Vancouver?
Pritet një pjesëmarrje e larmishme, diskutime kuptimplota dhe një eksperiencë që shkon përtej një eventi tradicional rrjetëzimi.
Një nga risitë e këtij viti është ofrimi i LinkedIn headshots falas për pjesëmarrësit, për t’i ndihmuar ata të forcojnë profilin dhe imazhin e tyre profesional.
Qëllimi është që pjesëmarrësit të largohen jo vetëm me kontakte të reja, por edhe me mjete konkrete për zhvillimin e karrierës, ide të reja dhe një ndjenjë të fortë përkatësie.
Kur mbahet eventi dhe si mund të regjistrohen të interesuarit?
Albanian Professionals Networking Event do të mbahet më 14 Mars, nga 1:00 PM – 5:00 PM, në UBC Robson Square, Vancouver.
Regjistrimi bëhet përmes linkut zyrtar:
https://ubc.ca1.qualtrics.com/jfe/form/SV_0UMFG4cGczcGqFM
Eventi ofrohet falas për pjesëmarrësit, falë mbështetjes së donatorëve dhe partnerëve, me bindjen se rrjetëzimi profesional dhe ndërtimi i komunitetit duhet të jenë të aksesueshme për të gjithë.
