By Ekonomia globale po përballet me një periudhë të rritjes së dobët dhe inflacionit. Politika më e shtrënguar monetare dhe normat reale më të larta të interesit, çmimet e larta të energjisë, rritja e dobët e të ardhurave të familjeve dhe rënia e besimit, pritet të ndikojnë në rritjen ekonomike, veçanërisht në vitin 2023.
Mbështetja fiskale për të zbutur ndikimin e kostove të larta të ushqimit dhe energjisë, do të ndihmojë në kufizimin e ngadalësimit. Humbjet e vendeve të punës mund të jenë gjithashtu më të kufizuara se sa pritej në rëniet e kaluara.
Kursimet e grumbulluara gjatë pandemisë ofrojnë edhe njëfarë mbrojtjeje për sektorët e ekonomive familjare dhe të korporatave, megjithëse këto nuk janë të shpërndara në mënyrë të barabartë.
Pasiguria e lartë mund të kufizojë shkallën në të cilën tërhiqen kursimet dhe t’i pengojë firmat të bëjnë investime afatgjata.
Ngadalësimi i parashikuar i rritjes së PBB-së globale në vitin 2023 do të zbutet deri në njëfarë mase nga rënia e mëtejshme e normave të kursimit të familjeve që pritet të ndodhë në disa ekonomi të mëdha të përparuara, megjithëse jo në Shtetet e Bashkuara, ku norma e kursimit ka rënë tashmë nën nivelet para pandemike.
Një rimëkëmbje e lehtë parashikohet të fillojë në shumicën e vendeve në vitin 2024, me rimëkëmbjen e rritjes reale të të ardhurave dhe zbehjen e presioneve inflacioniste, duke ofruar hapësirë për ndërmarrjen e hapave fillestarë për të lehtësuar politikën monetare në Amerikën e Veriut, Europën Qendrore dhe Lindore dhe shumë ekonomi të tregjeve në zhvillim.
Në rajonin e Azisë/Paqësorit, ku shumë vende kanë inflacion relativisht të ulët dhe politikat mbështetëse parashikohet të ndihmojnë rimëkëmbjen e rritjes ekonomike në Kinë, perspektivat duken më të mira se në Amerikë ose Europë. Në shumë vende europiane, janë parashikuar rënie afatshkurtra të prodhimit, duke përfshirë Gjermaninë, Italinë, Mbretërinë e Bashkuar dhe Eurozonën.
Kjo rezulton në një projeksion jashtëzakonisht të çekuilibruar, me rezultate që varen shumë nga mungesa e ndonjë goditjeje të rëndësishme negative në ekonomitë kryesore aziatike të tregjeve në zhvillim, të cilat së bashku përbëjnë afërsisht tre të katërtat e rritjes globale në vitin 2023 dhe rreth tre të pestat në 2024.
Europa po preket veçanërisht rëndë nga lufta në Ukrainë dhe nga çmimet e larta të energjisë, të cilat pritet të vazhdojnë gjatë gjithë periudhës së parashikimit.
Rritja në Europë po ngadalësohet ndjeshëm në fund të vitit 2022, si rezultat i luftës në Ukrainë dhe kërkesës së dobët të jashtme dhe prodhimi parashikohet të ulet në disa vende gjatë dimrit.
E frenuar nga çmimet e larta të energjisë dhe ushqimeve, besimi i dobët, pengesat e vazhdueshme të ofertës dhe ndikimi i politikës më të shtrënguar monetare, rritja vjetore në Eurozonë në vitin 2023, parashikohet të jetë 0.5%, dhe 3.3% në vitin 2022, përpara se të rritet në 1.4% në vitin 2024, kur shpenzimet pritet të fillojnë të rimëkëmben.
Zbatimi i planeve të programit Next Generation nga BE-ja, pritet të mbështesë investimet. Rritja e ulët e kërkesës do të ndihmojë në zbutjen e inflacionit, por tregjet e shtrënguara të punës, dhe perspektiva që çmimet e larta të energjisë me shumicë do të vazhdojnë të rrisin çmimet e shitjes me pakicë në vitet 2023 dhe 2024, nënkuptojnë se inflacioni do të ulet vetëm gradualisht, duke mbetur mbi objektivin në vitin 2024.
Normat më të larta të interesit, çmimet e larta të energjisë dhe ushqimeve dhe besimi i dobët, po ndikojnë negativisht në Mbretërinë e Bashkuar, ku prodhimi parashikohet të tkurret me 0.4% në vitin 2023 dhe të rritet me vetëm 0.2% në vitin 2024, për shkak të një politike më të shtrënguar fiskale që pengon rimëkëmbjen.
Ashtu si në Eurozonë, kërkesa më e dobët parashikohet të ndihmojë në uljen e qëndrueshme të inflacionit, në 6.8% në vitin 2023 dhe 3.4% në 2024. MONITOR.al
