By 
Berat– Në Galerinë e Arteve “Edward Lear”, pranë Qendrës Kulturore “Margarita Tutulani” në Berat, është çelur ekspozita personale e piktorit shqiptaro-kanadez Zeqirja Rexhepi, i njohur në botën e artit me emrin artistik Zeqa.
Ekspozita sjell për publikun mbi 40 punime, të cilat përfaqësojnë një trashëgimi të pasur emocionale dhe artistike, të ndërtuar përgjatë një jete të tërë krijimtarie. Veprat dallohen për teknikën e gjallë dhe energjike të kompozimit, ku ndërthuren figura muzikantësh të stilizuar, motive të nostalgjisë dhe një ritëm vizual i fuqishëm që fton vizitorin në një udhëtim përmes kujtesës, identitetit dhe ndjeshmërisë njerëzore.
Ekspozita do të qëndrojë e hapur për publikun deri më 12 korrik 2026.
Zeqirja Rexhepi lindi në vitin 1955 në Përlepnicë të Gjilanit, në Kosovë. Ai është një artist shqiptaro-kanadez me një karrierë të gjatë dhe të spikatur në fushën e arteve pamore. Përpara emigrimit, ai shërbeu si dizajner kryesor tekstili në një nga fabrikat më të mëdha të tekstilit në Evropë dhe zhvilloi një aktivitet të gjerë artistik me ekspozita në Kosovë dhe jashtë saj.
Ndër veprat e tij më të njohura mbetet murali monumental “Albanian Persecution, 1846”, me sipërfaqe 650 metra katrorë, i realizuar në vitin 1991 së bashku me artistin Demir Behluli në Kishën e Binçës në Gjilan.
Pas luftës së Kosovës në vitin 1999, Zeqa dhe familja e tij gjetën strehim në Kanada. I vendosur në provincën e Nova Scotia, ai vazhdoi aktivitetin artistik duke kontribuar në mënyrë të rëndësishme në jetën kulturore kanadeze. Gjatë viteve, veprat e tij janë prezantuar në një sërë ekspozitash personale dhe kolektive në Kanada, Shqipëri, Kosovë dhe vende të tjera, duke e kthyer atë në një urë të rëndësishme kulturore mes komunitetit shqiptar dhe atij kanadez.
Ekspozita në Berat vjen si një tjetër dëshmi e lidhjes së fortë që artisti ruan me vendlindjen dhe hapësirën shqiptare, duke sjellë para publikut një univers artistik të pasur me ngjyra, emocione dhe kujtesë historike.
