By 
BRUKSEL – Shqipëria ishte pjesë e diskutimeve të nivelit të lartë të zhvilluara në Parlamentin Evropian, ku ekspertë, eurodeputetë dhe organizata nga e gjithë Evropa u mblodhën për të diskutuar mbi ndikimin e sëmundjeve të kafshëve në shëndetin publik, ekonominë dhe qëndrueshmërinë mjedisore.
Konferenca me titull “The True Cost of Animal Disease: Animal Welfare, Public Health & Sustainability in the EU” solli në një tryezë të përbashkët profesionistë të fushës veterinare, studiues dhe përfaqësues të organizatave ndërkombëtare për të diskutuar rëndësinë e investimit në parandalim dhe politika afatgjata për mbrojtjen e kafshëve dhe komuniteteve.
Në këtë forum mori pjesë edhe Oli Pero, në përfaqësim të organizatave Animals Need Me dhe Montreal SPCA, duke kontribuar në diskutimet mbi sfidat dhe praktikat më të mira në fushën e mirëqenies së kafshëve.
Një moment i rëndësishëm i konferencës ishte prezantimi i bërë nga Dr. Gloria Hylviu, përfaqësuese e AKVMB-së dhe Urdhrit të Mjekut Veterinar Shqiptar, e cila ndau përvojën e Shqipërisë në menaxhimin e sëmundjes PPR gjatë vitit 2025.
Pjesëmarrësit theksuan se mirëqenia e kafshëve nuk është më një çështje e izoluar, por një komponent thelbësor i shëndetit publik, sigurisë ushqimore dhe mbrojtjes së biodiversitetit. Në këtë kuadër, Shqipëria ka mundësinë të përfitojë nga përvojat dhe praktikat evropiane në rrugën e saj drejt harmonizimit me standardet e Bashkimit Evropian.
Përfaqësuesit shqiptarë e cilësuan pjesëmarrjen në këtë forum si një mundësi të rëndësishme për të sjellë zërin dhe përvojën e Shqipërisë në arenën evropiane, për të krijuar partneritete të reja dhe për të nxitur politika më humane dhe më të qëndrueshme në vend.
Mesazhi kryesor që doli nga konferenca ishte se sfidat e së ardhmes kërkojnë një qasje proaktive dhe holistike, ku shëndeti i kafshëve, shëndeti i njerëzve dhe mbrojtja e mjedisit trajtohen si pjesë e të njëjtit sistem.
Organizatorët falënderuan të gjithë pjesëmarrësit dhe partnerët, përfshirë Federation of Veterinarians of Europe, për kontributin në një debat që po fiton gjithnjë e më shumë rëndësi në nivel evropian.
