By 
MONTREAL, KANADA – Polifonia shqiptare ishte në qendër të vëmendjes akademike ndërkombëtare gjatë konferencës LabPhon20, e mbajtur në Universitetin McGill University në Montreal, ku studiues nga vende të ndryshme diskutuan lidhjet mes gjuhës dhe muzikës në evolucionin e shoqërisë njerëzore.
Në një workshop të posaçëm kushtuar marrëdhënies midis gjuhës dhe muzikës, studiuesja shqiptare Enkeleida Kapia, së bashku me Vaso Tole dhe Plator Gashi, prezantuan një studim mbi polifoninë shqiptare dhe lidhjen e saj me strukturën intonative të gjuhës shqipe.
https://www.albanologie.uni-muenchen.de/index.html?fbclid=IwY2xjawS3dUZleHRuA2FlbQIxMABzcnRjBmFwcF9pZBAyMjIwMzkxNzg4MjAwODkyAAEebi-O-luuYqnOZiD-ICoBDyGOKZIf-tDmNoOVFj1iI9_ojUJJCPk-xR8dyzY_aem_mVvJqvT3uYeMJ-73q5ShBg
Sipas studiuesve, rezultatet e deritanishme tregojnë një marrëdhënie të fortë midis polifonisë shqiptare dhe mënyrës se si organizohet intonacioni në gjuhën shqipe. Kjo sugjeron se kënga tradicionale dhe gjuha kanë evoluar së bashku ndër shekuj, duke ruajtur elemente të përbashkëta që mund të ndihmojnë në kuptimin më të thellë të historisë kulturore dhe gjuhësore të shqiptarëve.
Punimi u prit me interes të veçantë nga pjesëmarrësit e konferencës, të cilët shfaqën kureshtje të madhe për traditën unike të iso-polifonisë shqiptare, një pasuri e njohur edhe nga UNESCO si pjesë e trashëgimisë shpirtërore të njerëzimit.
Në panel u prezantua gjithashtu edhe polifonia korsikane, duke krijuar mundësi interesante krahasimi mes traditave të ndryshme polifonike të Evropës. Studiues nga Sorbonne University ndanë kërkimet e tyre mbi analizat artikulative të polifonisë korsikane, ndërsa janë nisur edhe diskutime për bashkëpunime të reja shkencore me ekipin që studion polifoninë shqiptare.
Përmes këtij prezantimi në Montreal, polifonia shqiptare jo vetëm që u promovua në një forum të rëndësishëm akademik ndërkombëtar, por u vlerësua edhe si një burim i çmuar për kërkimet bashkëkohore mbi origjinën dhe zhvillimin e gjuhës dhe muzikës në historinë e njerëzimit.
Ky ishte një tjetër moment i rëndësishëm për promovimin e kulturës dhe trashëgimisë shqiptare në arenën akademike ndërkombëtare, falë punës së studiuesve shqiptarë dhe interesit në rritje që komuniteti shkencor po tregon ndaj iso-polifonisë shqiptare.
