By 
OSHAWA, ONTARIO – Historia e suksesit të shqiptarëve në Kanada po pasurohet me një tjetër emër që po spikat në jetën publike dhe institucionale të vendit. Shqiptaro-kanadezja Danjeza Danglli ka regjistruar zyrtarisht kandidaturën e saj për Këshilltare Bashkiake të Qytetit të Oshawa, në zgjedhjet lokale që do të mbahen më 26 tetor.
Kandidatura e saj ka edhe një simbolikë të veçantë. Pikërisht 18 vjet pasi emigroi në Kanada si landed immigrant, në të njëjtën datë ajo vendosi të hedhë një hap të ri në jetën e saj publike, duke synuar të përfaqësojë qytetarët e Oshawa-s në nivelin vendor.
E njohur për angazhimin e saj në çështjet sociale, administratën publike dhe përfaqësimin e komunitetit shqiptar, Danjeza është aktualisht Kryetare e Degës së Durham Region pranë Albanian Canadian Political Action Committee (ACPAC), ku ka luajtur një rol të rëndësishëm në forcimin e pranisë së shqiptarëve në jetën qytetare dhe politike të rajonit.
Rruga e saj profesionale është ndërtuar mbi një bazë të fortë akademike dhe institucionale. E diplomuar në drejtësi në South East European University, ajo vazhdoi studimet në Kanada dhe ndërtoi një karrierë të suksesshme në sektorin publik. Për vite me radhë ka punuar në institucione të rëndësishme provinciale dhe kombëtare, duke kontribuar në zhvillimin e politikave publike, proceseve zgjedhore dhe reformave administrative.
Një nga momentet më të rëndësishme të karrierës së saj ishte angazhimi në Komisionin për Zhvillimin e Standardeve të Teknologjive të Votimit në Ontario, ku mori pjesë në hartimin e rekomandimeve për modernizimin e procesit zgjedhor elektronik në provincë. Më pas, ajo drejtoi një prej projekteve më të mëdha të transformimit të të dhënave zgjedhore për të 444 bashkitë e Ontarios, duke bashkëpunuar me administratat lokale në përgatitje të zgjedhjeve komunale.
Sot, Danjeza Danglli punon në organizatën kombëtare March of Dimes Canada, ku merret me planifikim strategjik dhe menaxhimin e projekteve me ndikim social në shkallë kombëtare.
Përtej karrierës profesionale, ajo është e njohur për përkushtimin e saj ndaj komunitetit. Si vullnetare në organizata që mbështesin gratë, fëmijët dhe grupet në nevojë, si dhe si promotore e gjuhës dhe kulturës shqiptare në Amerikën e Veriut, Danjeza ka ndërtuar profilin e një lidereje komunitare të angazhuar dhe të respektuar.
Kandidatura e saj konsiderohet një moment i rëndësishëm për komunitetin shqiptar në Ontario, duke reflektuar rritjen e përfaqësimit të shqiptarëve në institucionet publike kanadeze. Nëse zgjidhet më 26 tetor, ajo do të sjellë në Këshillin Bashkiak të Oshawa-s përvojën e saj në administratë publike, politika sociale dhe zhvillim strategjik, me synimin për t’u shërbyer të gjithë qytetarëve të qytetit.
Rasti i Danjeza Dangllit është një tjetër dëshmi se shqiptarët në Kanada po bëhen gjithnjë e më të pranishëm në vendimmarrje, duke kontribuar jo vetëm në jetën ekonomike e sociale të vendit, por edhe në drejtimin e institucioneve që formësojnë të ardhmen e komuniteteve ku jetojnë.
Nga Blerina Ruka/ Albanian Montreal Press
