By British Columbia- Kanada
Është mbajtur gjatë fundjavës në katedralen Christ Church të Vancouver koncerti i parë simfonik mbi kryeveprat botërore të kompozitorëve klasikë Ludwig van Beethoven dhe Johannes Brahms.
Orkestra Simfonike e Bregut Perëndimor (West Coast Symphon) shkëlqeu duke prezantuar një shfaqje cilësore të repertorit orkestral për audiencën në gjithë provincën e British Columbia.
Nën dirigjimin kryesor të maestros shqiptar Bujar Llapaj, eventi prezantoi për publikun pjesë të përzgjedhura nga klasikët botërorë. Në bashkëpunim me dirigjentët e huaj Nicholas Urquhart dhe Bryan Deans, eventi muzikor u ndoq masivisht nga të gjithë adhuruesit e muzikës klasike.
Beethoven dhe Brahms mbeten kompozitorët më të admiruar në historinë e muzikës perëndimore; veprat e të cilëve renditen ndër më të interpretuarat e repertorit klasik.
Dirigjenti shqiptar, fitues i mjaft çmimeve, është një figurë e shquar në skenën e muzikës klasike ballkanike. Pas formimit të tij artistik pranë Akademisë së Arteve në Tiranë dhe Konservatorit Kombëtar de Rueil Malmaison në Francë, ai u emërua si dirigjent kryesor i Orkestrës Simfonike të Bregut Perëndimor në vitin 2008. Llapaj ka drejtuar koncerte në të gjithë Evropën dhe ai ende është pjesë e mjaft eventeve të të njëjtës natyre si dirigjent i ftuar.
Maestro Llapaj njihet si një dirigjent emocionues, karizmatik, dhe i durueshëm. Strategjitë e tij janë mjaft efektive si për muzikantët profesionistë ashtu edhe për ato amatorë.
