By Fundjavën e kaluar, komuniteti shqiptar në Montreal u mblodh për të festuar 18-vjetorin e Pavarësisë së Republikës së Kosovës në një mbrëmje solemne dhe plot emocione, e cila bashkoi krenarinë, kujtesën historike dhe frymën e unitetit kombëtar.
Mbrëmja u përcoll nga Blerina Ruka, kryeredaktore e Albanian Montreal Press, si dhe nga Xhemi Agaj, moderator i ODA Albanian Podcast, i ardhur posaçërisht nga Toronto për të nderuar këtë aktivitet të rëndësishëm.
Në fjalën e saj hapëse, u theksua se kjo datë nuk përfaqëson vetëm një përvjetor historik, por një simbol të sakrificës, qëndresës dhe shpresës së një populli që besoi në liri. Organizimi i aktivitetit u bë i mundur falë përkushtimit të Shoqatës Kosova në Montreal, e cila prej vitesh mban gjallë identitetin dhe kulturën shqiptare në diasporë, duke bashkuar shqiptarët dhe miqtë e tyre.
Bashkëmoderatori i mbrëmjes, Xhemi Agaj, shprehu emocionin e tij për pjesëmarrjen në këtë aktivitet, duke theksuar se Pavarësia e Kosovës është një arritje që nuk erdhi lehtë, por u pagua me sakrificë dhe dashuri për lirinë. Ai u shpreh se Kosova sot nuk është vetëm një shtet në hartë, por një histori mbijetese dhe një dëshmi se identiteti nuk shuhet dhe se drejtësia, edhe kur vonon, fiton.
Gjithashtu, ai nënvizoi rëndësinë e përgjegjësisë së diasporës për të ardhmen e vendit, duke theksuar se festa shërben jo vetëm për të kujtuar të shkuarën, por edhe për të forcuar angazhimin ndaj brezave të ardhshëm.
Me interpretimin e saj plot ndjenjë dhe autenticitet, Alberi Hadergjonaj krijoi një lidhje të veçantë emocionale me publikun, duke e kthyer sallën në një hapësirë të gjallë kujtimesh dhe krenarie kombëtare. Zëri i saj i fuqishëm dhe repertori i zgjedhur me kujdes dëshmuan edhe një herë përkushtimin e saj ndaj ruajtjes dhe promovimit të muzikës shqiptare në diasporë. Programi përfshiu gjithashtu Ilir Puka, DJ Vali, Andi Pema me daulle si dhe fotografinë profesionale nga Lorenc.
Gjatë aktivitetit u shprehën falënderime institucionale për përkrahjen dhe mbështetjen e vazhdueshme të:
- Znj. Ilirjana Latifi, Kryetare e Shoqatës Kosova në Montreal,
- Shkëlqesisë së Saj, znj. Artemis Malo, Ambasadore e Shqipërisë në Kanada,
- Znj. Kaltrina Morina, Sekretare e Ambasadës së Republikës së Kosovës në Kanada.
Gjithashtu, grupi i valleve Albos shkëlqeu me interpretimin e valleve tradicionale nga të gjitha trevat shqiptare, duke sjellë në skenë ngjyra, energji dhe krenari kulturore, të cilat u pritën me duartrokitje të shumta nga publiku.
Një mirënjohje e veçantë iu drejtua gjithashtu sponsorëve, bizneseve shqiptare dhe të gjithë mbështetësve që kontribuuan në realizimin e kësaj mbrëmjeje festive. Në mbyllje, organizatorët falënderuan të gjithë të pranishmit për pjesëmarrjen dhe mbështetjen, duke i ftuar të ruajnë dhe të përcjellin vlerat e lirisë, unitetit dhe krenarisë kombëtare.
Festa e 18-vjetorit të Pavarësisë së Kosovës në Montreal u shndërrua në një moment reflektimi, bashkimi dhe krenarie, duke dëshmuar edhe një herë lidhjen e fortë mes diasporës shqiptare dhe atdheut.
Nga Blerina Ruka/ Albanian Montreal Press
