Montreal/ Shkolla shqipe ”Nënë Tereza” në Kanada mbyll me sukses vitin shkollor

E shtuna e datës 20 Maj shënoi përfundimin e vitit shkollor te Shkolla Shqipe Nënë Tereza. Ky vit, si asnjëherë më parë, i pa fëmijët e shkollës të arrinin nivele më të larta, qoftë në aspektin e gjuhës, po ashtu edhe për sa i përket historisë së atdheut/mëmëdheut tyre, Shqipërisë. Këto nivele u arritën në mënyrë paralele falë një programi rigoroz i përgatitur me shumë dashuri nga mësuesja Patricia Cani, një larmi aktivitetesh fizike të përgatitura nga Emilio Dako, por gjithashtu nga fakti se prindërit e fëmijëve të cilët morën pjesë këtë simestër vendosën ti sillnin ata per të disatin simestër rradhazi, gjë e cila ndihmon jashtzakonisht për arsye evidente.

Atmosfera e krijuar midis fëmijëve, mësuesve, prindërve dhe administratorëve na tregoi se në komunitetin tonë, kur ka mirësjellje, dëshirë për komunikim, energji pozitive, këmbëngulje për të bërë punë të mira, dhe mbi të gjitha BASHKPUNIM dhe JO PËRÇARJE, gjithçka mund të arrihet dhe potenciali është i jashtzakonshëm, sidomos për të patur rezultate konkrete të cilat do të ndihen në komunitet për vite me rradhë dhe jo vetëm në rrjetet sociale.

Mbetet për tu parë nëse të gjitha këto pika do të mund të arrihen në të ardhmen afatshkurtër dhe atë afatgjatë.

Për ta mbyllur vitin shkollor ashtu siç i ka hije, ju ftojmë, prindër dhe fëmijë, pjesëmarrës të shkollës Shqipe ose jo, për një piknik në datën 10 Qershor 2023, të festojmë festën e femijëve, fillimin e VERËS dhe fundin e vitit shkollor. Pas katër vitesh, ky aktivitet do të shënojë gjithashtu aktivitetin e fundit komunitar organizuar nga kryesia aktuale. Më shumë detaje do të vijnë gjatë ditëve në vazhdim.