By Mali i Zi ka zgjedhur sot me 45 vota për dhe tri kundër kryeministrin e ri, shqiptarin Dritan Abazoviç. Qeveria Abazoviç do të ketë 18 ministri, katër nënkryetarë të cilët janë edhe ministra të linjës dhe dy ministra pa portofol. Në Qeverinë e re të Malit të Zi, do të jenë edhe dy ministra shqiptarë. Marash Dukaj do të jetë ministër i Administratës Publike, kurse Fatmir Gjeka, ministër i të Drejtave të Njeriut dhe Minoriteteve.
Parlamenti i Malit të Zi votoi sot për një qeveri të re të pakicës, e para në historinë e saj, me një mandat njëvjeçar për t’u përgatitur për zgjedhjet e parakohshme të pranverës së ardhshme.
Abazoviç: Qeveria do të zgjasë për aq kohë sa rrethanat politike të jenë të favorshme
Kryeministri i sapozgjedhur i Malit të Zi, Dritan Abazoviç, tha pas seancës së Kuvendit tha se Qeveria do të zgjasë për aq kohë sa rrethanat politike të jenë të favorshme dhe për aq kohë sa deputetët e lejojnë atë.
“Është e kufizuar në një vit, por marrëveshja e koalicionit thotë se pas një viti do të përmblidhen rezultatet dhe do të shihet se çfarë do të ndodhë më pas, në një vit gjërat do të jenë shumë më mirë se sa janë sot”, tha Abazoviç. Ai tha se adresa e parë e tij për vizitë do të jetë Brukseli, por “nëse është e mundur, jam gati të shkojë edhe në Kiev”.
Duke folur për luftën kundër krimit, ai tha se mbase DPS kërkon të heqë qafe ata që kanë punuar kundër ligjit. “Drejtësia ka nisur. Pres surpriza pozitive për luftën kundër korrupsionit në nivele të larta. Do të ketë mbështetjen e plotë të qeverisë së re për të dhënë drejtësi, pres mbështetjen e deputetëve për zhbllokimin e institucioneve”.
Ai tha se synimi është që Qeveria e re të rimendojë një politikë tolerante, ajo përfshin njerëz të të gjitha besimeve dhe kombeve.
“Unë nuk jam skeptik. Nëse duam që partnerët evropianë të na njohin, ne do të duhet të japim rezultate”, theksoi Abazoviç. Në prezantimin e ekspozesë Abazoviç tha se detyrë e kësaj gjenerate politikanësh është të punojnë rreth interesave të përgjithshme të shoqërisë. Detyrim i secilit ministër të këtij kabineti qeveritar, tha Abazoviç, është të shoh nga e ardhmja dhe të mos kthehet në të kaluarën.
“Ky shans nuk mund të na ikë. Duhet të çbllokojmë të gjitha institucionet”, tha Abazoviç para Kuvendit të Malit të Zi. Qeveria e re, vazhdoi të tregojë ai, do të mbështetet në dy shtylla kryesore – sundimi i ligjit dhe zhvillimi ekonomik.
