By Arta Rexhepi themelon fondacionin: Ura mes artit, humanizmit dhe trashëgimisë kulturore
E lindur nga rrënjë të thella artistike dhe rritur në një familje ku arti dhe kultura kanë qenë gjithmonë pjesë e pandarë e jetës, Arta Rexhepi – vajza e artistit të njohur kanadezo-shqiptar Zeqirja Rexhepi – ka ndërmarrë një hap të rëndësishëm e domethënës: themelimin e fondacionit të saj. Iniciativa synon të krijojë një platformë ku arti, humanizmi dhe trashëgimia kulturore ndërthuren për të realizuar projekte me ndikim afatgjatë.
Ajo vjen nga një familje që i ka dhënë shumë kulturës dhe skenës shqiptare. Krahas trashëgimisë artistike të të atit, Arta ndan të njëjtin udhëtim me motrën e saj, Tringa Rexhepi – aktore dhe këngëtare e njohur. Vetë Arta ka ndërtuar një karrierë të gjatë e të respektuar si gazetare në Kanada, duke sjellë në vëmendje histori njerëzore, çështje sociale dhe duke ngritur zërin në hapësirat publike e mediatike për tema me rëndësi shoqërore.
Një bord i fuqishëm dhe i përkushtuar
Fondacioni mbështetet nga një bord drejtorësh të përbërë nga gra të suksesshme dhe të angazhuara, që përfaqësojnë fusha të ndryshme të jetës publike dhe shoqërore:
- Venesa Sulimani – bija e një të mbijetuare dhe aktiviste e palodhur për të drejtat e njeriut;
- Ilirjana Latifi – presidente e Shoqatës Shqiptare “Kosova” në Montreal, e njohur për përkushtimin ndaj diasporës shqiptare;
- Shkendije Ibishi – autore që dokumenton përvoja njerëzore me ndjeshmëri dhe sinqeritet të veçantë;
- Arnisa Morina – avokate në Toronto, e angazhuar në çështje ligjore dhe sociale;
- Blerina Ruka – redaktore dhe themeluese e “Albanian Montreal Press”, zë i fuqishëm i komunitetit shqiptar në Kanada.
Misioni dhe vizioni
Fondacioni synon të zhvillojë projekte kulturore, artistike dhe humanitare, duke fuqizuar komunitetin, ruajtur identitetin kombëtar dhe promovuar vlerat universale të drejtësisë, kreativitetit dhe solidaritetit.
“Ky është një hap që e ndiej si detyrim moral dhe pasion shpirtëror,” shprehet Arta Rexhepi. “Jam e lumtur që jam e rrethuar nga gra të jashtëzakonshme që ndajnë të njëjtën vizion me mua.”
Me këtë nismë, Arta Rexhepi sjell jo vetëm përkushtimin e saj personal, por edhe një thirrje të fuqishme për veprim dhe bashkëpunim kolektiv. Fondacioni synon të bëhet një pikë referimi për artin, kulturën dhe humanizmin, duke kontribuar në ndërtimin e një të ardhmeje më të ndritur për komunitetin shqiptar në diasporë dhe për shoqërinë në tërësi.
