By Një prej ditëve të bukura e të shënuara të marsit është edhe ditëlindja jote ba! Viteve të tua sot u shtohet një numër. Ajo është thjesht një shifër e cila kurrë nuk të ka penguar të jesh i ri çdo ditë të jetës tënde.
Ba, ti ke qenë gjithçka në jetë tënde. Nëse çdo kush ka një talent të lindur, i yti është të jesh njeri. Ti je pjesë e jetës të çdo familjari, i çdo shoku, i të gjitha mbesave të tua, je bashkëudhëtar në jetën time. Unë e di sa të shenjtë e ke miqësinë, komunikimin, shoqërinë, muzikën apo artin tënd. Unë e kam parë në çdo punë tënden se prej dashurisë që ke për të bërë gjëra të mira, ke lënë aty gjurmë pasioni, përkushtimi e jete…
Dashuria për muzikën, jetën, artin dhe të bukurën të motivon që e gjithë jeta jote t’i përngjajë një feste që nuk mbaron. Dëshira se vetëm vullneti yt i hekurt do të ishte çelësi i suksesit, ka bërë që ti t’i rreshtosh disa trofe. Ato ka qenë krenari edhe për ne, edhe për disa të tjerë.
Ne kemi dashur gjithmonë që ditë si këto janë festë, janë dashuri, janë familje. Unë jam rritur që prej momentit kur ti ke dashur të të ndjek, kur ma ke kërkuar mendimin, prezencën, fjalën.
Ba, në jetën tënde muzika dhe kënga kanë qenë refren për ty, por ato s’të kanë mjaftuar. Ti na ke ushqyer edhe ne që në fëmijërinë e largët, se çdo portë e duhur suksesi dhe integriteti në jetë do të vinte prej vullnetit, prej pasionit, prej dëshirës.
Tani e kuptoj ba, sa shumë dashuri ke dhënë, se familja nuk lihet vetëm, as miqtë, edhe për kolegët e tu ti ke qenë gjithmonë aty. Tani unë e di edhe rëndësinë e të largtëve, edhe rëndësinë e dikujt që e kujtojmë në të rrallë se na i ke përmendur gjithmonë. Ti e ke dashur njeriun ba, po aq sa edhe e ke vlerësuar, i ke krijuar, i ke kënduar, i ke shkruar njeriut…
Ba, unë gjithmonë jam emocionuar kur të tjerët ta kanë përmendur emrin, dhe sa herë ata kanë rreshtuar kujtimet me ty, e sa shumë që janë… ?!
Ti i di disa sekrete jetës babush, sa ekuilibra lumturie ke gjetur, sa balanca ke krijuar mes karrierës tënde dhe familjes, sa kohë dhe tentativa për të na afruar tek arti jot, sa këshilla e dashuri për të prekur nga afër foklorin, muzikën, instrumentin, e sa ditë e urime për të dashur njeriun.
I dashur babi im, të shkruash për ty, mua më duhet të jetoj po aq bukur e gjatë jetën tënde festive, dhe kur të të mund të përngjaj, do ta shëmbëllej se nga kush kam ngjar. Me shumë mall, gëzuar ditëlindjen!
E jotja, Blerina!
