By Sulmet e ndërsjella me raketa mes Izraelit dhe Iranit vijuan për të katërtën ditë radhazi. Qe prej nisjes së konfliktit janë regjistruar mbi 250 viktima dhe qindra të plagosur në të dyja vendet. Sulmet izraelite kanë vrarë nga e premtja 224 iranianë, 90% e të cilëve, civilë.
Izraeli bëri thirrje që civilet në Teheran të largohen menjëherë nga vendbanimet e tyre pasi do të bombardonin lindjen e perëndimin e vendit. Të njëjtën gjë bëri edhe vetë Ushtria Iraniane, duke iu kërkuar banorëve të Tel Avivit që të largohen.
Kryeministri izraelit Beniamin Netanyahu gjatë një vizite në një bazë ajrore ushtarake tha se po kontrollojnë hapësirën ajrore mbi Teheran dhe se janë në rrugën e duhur për arritjen e një fitoreje, duke siguruar dy objektivat: eliminimin e kërcënimit bërthamor e raketor.
Në një intervistë , ai nuk e përjashtoi rrëzimin e udhëheqësit suprem të Iranit, Ali Khamenei. I pyetur se Presidenti, Donald Trump, hodhi poshtë një plan izraelit për të vrarë Udhëheqësin Suprem të Iranit pasi do të përshkallëzonte konfliktin, Netanyahu tha: Kjo nuk do ta përshkallëzojë konfliktin, por do t’i japë fund konfliktit.
Ndërsa 8 izraelitë e vranë nga sulmet e natës së kaluar duke e çuar 24 numrin total të të vrarëve nga raketat iraniane këto ditë. Raketave nuk i shpëtoi as Tel Avivi, pasojat e rënies së të cilave thyen vetëm disa xhama në ambasadën amerikane.
Garda Revolucionare iraniane tha se përdori një taktikë të re goditjeje me raketa, që shpërqëndron mbrojtjen antiraketë të Izraelit dhe lejon raketat e fuqishme të arrijnë objektivat. U përdor për të parën herë raketa e fuqishme tokë – tokë “Haxh Kasem” me rreze deri 1400 kilometra, që mposht mbrojtjen raketore të sofistikuar amerikane Thaad që e disponon Izraeli.
Teksa luftimet nuk kanë të ndaluar, gazeta amerikane Wall Street Journal shkruan se Irani ka sinjalizuar gatishmërinë e tij për t’i dhënë fund armiqësive dhe për të rifilluar bisedimet bërthamore duke dërguar mesazhe Izraelit dhe Shteteve të Bashkuara përmes ndërmjetësve arabë.
Teherani u ka sinjalizuar ndërmjetësve se do të ishte i gatshëm të kthehej në tryezën e negociatave për sa kohë që Shtetet e Bashkuara nuk marrin pjesë në sulmet e Izraelit.
