Ajkuna Dakli boton librin me tregime “Çizme lëkure në kohë lufte”

Ajkuna Dakli boton librin me tregime “Çizme lëkure në kohë lufte”

Nga Shani Pnishi

Disa muaj më parë Shtëpia Botuese “Onufri” në Tiranë, nxorri në shtyp  librin me tregime “Çizme lëkure në kohë lufte” nga autorja shqiptare me banim në Toronto të Kanadasë

Libri vjen në tre pjesë :
Pjesa e parë  përbëhet nga tetë tregime të veçanta po me të njëjtin personazh dhe një rrjedhë kohore kronologjike. Ngjarjet të kthejnë në kohën e diktaturës komuniste në Shqipëri,  një kohe të shkuar, së cilës nuk mund t’i ikësh aq lehtë. Personazhi kryesor është një vajzë e vogël, e cila duke u rritur fillon të zbulojë se shoqëria që e rrethon është thellësisht e politizuar, dhe se ajo jeton në një botë të padrejtë, ku mungon liria e shprehjes dhe mendimit. Kupton për më tepër se  edhe familja e saj bënte pjesë në grupin shoqëror që diskriminohej nga sistemi për arsye politike. Në rrjedhën e natyrshme të ngjarjeve, pjesa e parë mbyllet tregimin “Protezë”, ku autorja duke përshkruar sesi populli “po derdhej qendrës së sheshit duke u përpjekur të rrethonte statujën e udhëheqësit që ngrihej drejt, me pallton e shpalosur dhe grushtin lart, duke krijuar një pamje disi groteske”, e bën personazhin tashmë të rritur  dëshmitar të rënies së diktaturës.

Pjesa e dytë përbëhet nga dhjetë tregime, ngjarjet e të cilave zhvillohen gjithashtu në Shqipëri në periudhën e diktaturës  dhe tranzicionit. Tematika  vjen nga problematikat e shoqërisë shqiptare në këto dy periudha dhe prekin tema si plaga e emigracionit, shndërrimi grotesk që sjell diktatura tek individi, metamorfoza e marrëdhënieve njerëzore në një shoqëri me dallime sociale, absurditeti i luftës, pozita e pabarabartë e gruas në shoqërinë patriarkale shqiptare etj.

Pjesa e tretë është një tregim më i gjatë, i strukturuar në formën e letrave të shkruara nga personazhi dhe narratives së autores. Është historia e një nëne të re e cila largohet nga jeta ndërkohë që lë pas një fëmijë të vogël dhe përpiqet ndërkaq të gjejë një mënyrë për të qenë e sigurt që i biri do rritet siç duhet. Ajo nuk mund t’i ofrojë djalit praninë e saj fizike në këtë jetë, por i lë pas dashurinë “Krijoje ditën të bukur, shpirt, siç të pëlqen ty! Gëzimi që ndien nga krijimi i një dite të tillë, të nxit të krijosh ditën tjetër, ditën tjetër, ditën tjetër. Vrapo nëpër ditë, shpirti im, se vetëm kështu mund të ecësh përpara. Ti duhet të ecësh përpara”.

Përfunduam këtë libër me tregime të shkurtra me ndjenjën më të mirë se autorja vazhdon të gjejë tema dhe motive mjaft tërheqëse për lexuesit, duke ngjallur një dëshirë për të hyrë në botën që ajo krijon. 
Ajkuna ka shkruar që në vegjëli, po vetëm vitet e fundit shkrimet e saj panë dritën e botimit, në fillim me vëllimin poetik “Rrokje” botuar nga Botart në 2016,  dhe vitin e kaluar me këtë libër me tregime. Ka shkruar dhe vazhdon të shkruajë edhe në revista të njohura të letrave shqipe si “Peizazhe të Fjalës”, “Poeteka” dhe “Exlibris”, botime që e kanë ndihmuar shumë në rrugëtimin e saj drejt librave.
Ajkuna Dakli u lind në Elbasan , Shqipëri në maj të vitit 1969. Në vitin 1991 u diplomua në Universitetin e Tiranës, FSHN Dega Matematikë. Në vitin 2001 u vendos  bashkë me familjen në Toronto ku jeton edhe sot.\gazetadiaspora\

administrator

Related Articles