NJË SHQIPTARE NË GARËN PËR KËSHILLIN BASHKIAK TË MISSISSAUGËS

Komuniteti shqiptar në Kanada ka një tjetër arsye për t’u ndier krenar.

Mendi Kabashi ka shpallur zyrtarisht kandidaturën e saj për Këshillin Bashkiak të Mississaugës, Ward 3, duke nisur një kapitull të ri të angazhimit të saj publik në shërbim të komunitetit.

Pas muajsh reflektimi, konsultimesh me banorët dhe mbështetjes së familjes, miqve, kolegëve dhe anëtarëve të komunitetit, Kabashi ka vendosur të kandidojë me vizionin për të sjellë një përfaqësim të fortë, transparent dhe të përgjegjshëm për banorët e Ward 3.

Me një përvojë të gjerë në shërbimin ushtarak, në fushën e drejtësisë, në drejtimin e komuniteteve dhe menaxhimin e komuniteteve të mëdha rezidenciale, ajo thekson se parimi që e ka udhëhequr gjithmonë është se “udhëheqja është shërbim.”

Në platformën e saj, Kabashi vendos theksin te:

komunitete më të sigurta;

menaxhimi i përgjegjshëm i fondeve publike;

përmirësimi i shërbimeve për qytetarët;

përfaqësimi dinjitoz dhe i drejtpërdrejtë i banorëve në Bashkinë e Mississaugës.

“Ward 3 është një komunitet i mrekullueshëm, i ndërtuar nga familje punëtore, të rinj, të moshuar dhe biznese lokale që meritojnë të dëgjohen, të respektohen dhe të përfaqësohen me dinjitet,” shprehet ajo.

Një rol të rëndësishëm në rrugëtimin e tij drejt kandidimit për Këshillin Bashkiak të Mississaugës ka luajtur edhe ACPAC (Albanian Canadian Political Action Committee), organizatë që promovon angazhimin qytetar, lidershipin dhe përfaqësimin e shqiptarëve në jetën publike dhe politike të Kanadasë.

Kabashi ka shprehur mirënjohjen e tij për mbështetjen, inkurajimin dhe besimin që ka marrë nga ACPAC gjatë procesit të vendimmarrjes për të hyrë në garën elektorale. Sipas tij, kandidimi erdhi pas një periudhe të gjatë reflektimi dhe konsultimesh me drejtues dhe anëtarë të organizatës, si dhe me familjarë, miq, kolegë, mentorë dhe banorë të komunitetit.

Anëtar i ACPAC që prej 3 shkurtit 2026, Mendi Kabashi e konsideron këtë organizatë një platformë të rëndësishme që nxit pjesëmarrjen e shqiptarëve në institucionet demokratike të Kanadasë dhe fuqizon brezin e ri të liderëve me prejardhje shqiptare.

Ai theksoi se pret të vazhdojë bashkëpunimin me ACPAC dhe anëtarët e saj, si edhe me vullnetarët, mbështetësit dhe qytetarët e Mississaugës, me synimin për të ndërtuar një komunitet më të fortë, më të sigurt dhe më të bashkuar.

Mbështetja e ACPAC ndaj kandidaturës së Mendi Kabashit shihet si një tjetër shembull i angazhimit të komunitetit shqiptaro-kanadez për të rritur përfaqësimin e shqiptarëve në politikën lokale dhe për të nxitur pjesëmarrjen aktive në jetën publike të vendit.

Kabashi thekson se kjo fushatë nuk ka të bëjë vetëm me kandidaturën e saj personale, por me ndërtimin e një të ardhmeje më të mirë për të gjithë banorët e komunitetit.

Gjatë muajve në vijim, ajo do të zhvillojë takime me qytetarët për të dëgjuar idetë, shqetësimet dhe vizionin e tyre për të ardhmen e Ward 3.

Komuniteti shqiptaro-kanadez i uron suksese Mendi Kabashit në këtë sfidë të rëndësishme qytetare dhe demokratike.