By “Vatra” shkëlqen në Parlamentin e Kanadasë: Një udhëtim që nisi rastësisht dhe u kthye në krenari kombëtare
Nga një moment i vogël në rrjetet sociale, në një skenë historike në Parlamentin e Kanadasë.
Kështu nisi rrugëtimi i veçantë i grupit të valleve “Vatra” nga Windsor, pjesë e Shoqatës së Shqiptarëve të Windsor-it, i cili u bë pjesë e eventit prestigjioz “25@25: Refugees Making a Difference”, organizuar nga The Artistè Foundation në Ottawa.
Gjithçka filloi kur një video e një prej valltareve të reja të grupit, Aksa, tërhoqi vëmendjen e CEO-s së fondacionit, Arta Rexhepi. Një moment i thjeshtë, por që u kthye në një mundësi të jashtëzakonshme për të sjellë në skenë talentin dhe kulturën shqiptare.
Fillimisht, ftesa ishte për një performancë individuale, por shumë shpejt ideja mori përmasa më të mëdha. Në bashkëpunim me organizatorët dhe drejtuesit artistikë, u vendos që grupi “Vatra” të përfaqësohej me një ansambël të përzgjedhur fëmijësh valltarë, një përfaqësim dinjitoz i folklorit shqiptar në një nga institucionet më të rëndësishme të Kanadasë.
Grupi u përzgjodh nga Komiteti Artistik i fondacionit, nën drejtimin e koreografit të talentuar Ramazan Kellezi, duke dëshmuar nivelin e lartë artistik dhe përgatitjen profesionale të fëmijëve.
Një rol kyç në realizimin e performancës pati edhe koreografja e ardhur nga Michigan, Joli Agolli Paparisto, e cila punoi me përkushtim për të sjellë në skenë një interpretim autentik dhe energjik të valleve tradicionale shqiptare.
Për të qenë pjesë e këtij momenti historik, fëmijët dhe familjet e tyre përshkuan një rrugëtim prej plot 10 orësh nga Windsor drejt Ottawas një dëshmi e përkushtimit, dashurisë për kulturën dhe rëndësisë që ka ruajtja e identitetit në diasporë.
Gjatë qëndrimit në Otavë, grupi pati nderin të pritej në Ambasadën e Kosovës nga Ambasadori Adriatik Kryeziu, si dhe në Ambasadën e Shqipërisë nga znj. Artemis Malo; takime që forcuan më tej lidhjet kulturore dhe institucionale të komunitetit shqiptar në Kanada.
Kulmi i këtij udhëtimi ishte pjesëmarrja në Parlamentin Federal të Kanadasë, ku “Vatra” realizoi dy performanca të shkëlqyera. Fëmijët valltarë shkëlqyen në skenë dhe u shpërblyen me duartrokitje të gjata dhe emocione të veçanta nga të pranishmit — një moment krenarie për të gjithë komunitetin shqiptar.
Në një moment simbolik dhe domethënës, fëmijët u nderuan me certifikata mirënjohjeje të ndara nga vetë deputeti federal Kyle Seeback, një vlerësim që thekson rëndësinë e kontributit të tyre artistik dhe kulturor në këtë event.
Ky udhëtim nuk ishte thjesht një vizitë, ishte një përvojë që do të mbetet gjatë në kujtesën e fëmijëve që po rriten në mërgim, duke mbajtur gjallë gjuhën, traditën dhe identitetin shqiptar.
Mirënjohje e veçantë shkon për organizatorët, për fëmijët që përfaqësuan me dinjitet kulturën tonë dhe për prindërit që, me përkushtim të jashtëzakonshëm, bënë të mundur këtë rrugëtim.
Nga Edona Vllasaliu Kuçi / Anëtare e Komitetit Artistik “The Artisté Foundation“
Fotografia: Flamur Ilazi
