By Në një kohë kur historitë e suksesit të diasporës shqiptare po marrin gjithnjë e më shumë vëmendje ndërkombëtare, emri i Mendi Kabashit spikat si emër i disiplinës, profesionalizmit dhe elegancës në komunikim.
Me bazë në Toronto, Mendi Kabashi është sot një profesioniste e njohur në menaxhimin e pronave dhe një moderatore televizive që po ndërton një hapësirë të veçantë dialogu në median shqiptare në diasporë.
Rrugëtimi i saj profesional ka nisur në Itali, ku ajo përfundoi studimet për Drejtësi në Università degli Studi di Roma Tor Vergata gjatë ciklit pesëvjeçar të formimit për oficere, paralelisht me përgatitjen ushtarake në Accademia Militare di Modena. Kabashi hyri në histori si gruaja e parë shqiptare që përfundoi Shkollën e Oficerëve të Arma dei Carabinieri në Itali, duke mbajtur sot gradën e oficere në rezervë.
Pas këtij formimi të lartë institucional, ajo shërbeu në Shqipëri si këshilltare ligjore në Departamentin Juridik të Ministrisë së Mbrojtjes, ku fitoi përvojë të rëndësishme në procese ligjore dhe në funksionimin e strukturave shtetërore.
Më vonë, Mendi Kabashi vendosi të hapë një kapitull të ri në Kanada. Në Toronto ajo ndërtoi nga e para një karrierë të suksesshme në menaxhimin e pronave, duke u afirmuar në një sektor që kërkon disiplinë, vizion dhe përgjegjësi të lartë profesionale.
Sot ajo shërben si Senior Property Manager për dy komplekse të mëdha rezidenciale në zonën Liberty Village, ku menaxhon buxhete shumëmilionëshe, harton dhe mbikëqyr plane financiare vjetore, drejton projekte kapitale dhe ka udhëhequr projekte madhore infrastrukturore dhe mirëmbajtjeje. Në këtë rol ajo administron dhjetëra kontrata shërbimesh dhe mirëmbajtjeje dhe drejton një ekip operativ që përfshin staf administrativ, asistencë menaxheriale dhe kontraktorë të ndryshëm, duke garantuar standarde të larta shërbimi për komunitetin e banorëve.
Paralelisht me këtë karrierë dinamike, Mendi Kabashi ka ndërtuar edhe një profil të veçantë në media. Me një stil komunikimi të matur, një prezencë të qetë dhe aftësi për të zhvilluar biseda me thellësi, ajo ka nisur rrugëtimin e saj televiziv me emisionin “In Talks”, që transmetohet në NSM TV.
“In Talks” është një format bisedash të thelluara që eksploron dimensionin njerëzor të figurave me përgjegjësi dhe ndikim. Nën moderimin e Mendit, në studio vijnë profesionistë, drejtues, përfaqësues komunitetesh dhe personalitete publike, të cilët përmes një përzgjedhjeje të kujdesshme të të ftuarve hapen përpara dialogut dhe reflektimit.
Çdo episod i emisionit përqendrohet në rrugëtimin personal të të ftuarve – rrënjët, sfidat, momentet vendimtare dhe vlerat që formësojnë karakterin e tyre. “In Talks” nuk është debat dhe as një intervistë formale; është një hapësirë autentike ku fjala merr peshë dhe ku biseda zhvillohet me substancë dhe elegancë.
Në këtë mënyrë, Mendi Kabashi po ndërton një model të ri komunikimi televiziv në diasporë, duke sjellë në ekran biseda që shkojnë përtej titujve dhe roleve zyrtare dhe që e vendosin njeriun në qendër të rrëfimit.
Nga akademitë ushtarake të Italisë te përgjegjësitë menaxheriale në Toronto dhe studioja televizive e NSM TV, rrugëtimi i Mendit dëshmon se profesionalizmi, disiplinimi dhe kultura e dialogut mund të ndërtojnë ura të forta mes institucioneve, medias dhe komunitetit.
Një dimension tjetër i rëndësishëm i identitetit të saj është edhe trashëgimia artistike familjare. Mendi Kabashi është vajza e ikonës së kinematografisë dhe skenës shqiptare, Mirush Kabashi, një nga aktorët më të dashur dhe më të respektuar të kulturës shqiptare. Ky trashëgim kulturor duket se reflektohet edhe në mënyrën se si ajo ndërton dialogun publik – me ndjeshmëri, elegancë dhe respekt për fjalën.
Nga akademitë ushtarake të Italisë te përgjegjësitë menaxheriale në Toronto dhe studioja televizive e NSM TV, rrugëtimi i Mendit dëshmon se profesionalizmi, disiplinimi dhe kultura e dialogut mund të ndërtojnë ura të forta mes institucioneve, medias dhe komunitetit.
Përgatiti: Blerina Ruka/ Albanian Montreal Press
