By Pothuajse 25,000 njerëz që jetojnë në provincën kanadeze të Albertës janë evakuuar pasi zjarret kanë shpërthyer në të gjithë rajonin.
Pjesa më e madhe e Albertës qendrore është nën ndalimin e zjarrit pas një periudhe me erë dhe kushte jashtëzakonisht të nxehta, derisa sipas parashikimeve mundësit për reshje janë të dobëta.
Kryeministrja e Albertës Danielle Smith gjatë një konference shtypi bëri të ditur se temperaturat e larta kanë shkaktuar të paktën 103 zjarre në të gjithë provincën perëndimore.
“Pjesa më e madhe e Albertës ka përjetuar një pranverë të nxehtë dhe të thatë, mjaftojnë vetëm disa shkëndija për të ndezur disa zjarre vërtet të frikshme. Këto kushte nënkuptojnë se është shumë e lehtë që një zjarr të fillojë dhe të përhapet shpejt. Rezultati është situata e paprecedentë me të cilën po përballet sot provinca jonë”, thotë ajo.
Smith shprehu se zjarret kanë djegur më shumë se 301,000 hektarë, dhe që nga e premtja, të paktën 45 zjarre të reja kanë filluar me një gjendje të jashtëzakonshme lokale.
Mirëpo sipas saj, krahina posedon mjetet e duhura, teknologjinë e duhur dhe burimet në vend për të trajtuar këtë sfidë.
Zona e Albertës është rajoni kryesor i prodhimit të naftës, por deri më tani, rezervuarët e naftës nuk duket se i janë nënshtruar ndonjë rreziku.
Qyteti i Drayton, në jugperëndim të Edmonton, ishte nën një evakuim të detyrueshëm. Urdhrat e evakuimit janë lëshuar edhe për zonat rurale në perëndim dhe jugperëndim.
Zyrtarët shprehën se evakuimet e banorëve mund të zgjasin deri në tre ditë.
