By Propozimi i Entoni Blinkenit që aleatët perëndimorë të ndalin importin e naftës si një tjetër ndëshkim ndaj Rusisë për sulmin në Ukrainë e rriti me 20% brenda 24 orëve çmimin e naftës bruto në tregjet ndërkombëtare.
Mediat ndërkombëtare shkruajnë se në bursën londineze e naftës Brent, çmimi arriti këtë të hënë 139 dollarë për fuçi, por u ul më pas në kuotat e qëndrueshme të 129 dollarëve, gjithsesi niveli më i lartë i 13 viteve të fundit. Çmimi më i lartë i naftës bruto i arritur ndonjëherë është 147 dollarë për fuçi, në Korrik të 2008-s.
Që prej 24 shkurtit kur nisi sulmi rus ndaj Ukrainës, çmimi i naftës bruto në tregjet ndërkombëtare është rritur me të paktën 30%. Ekspertët paralajmërojnë se nëse aleatët perëndimorë miratojnë propozimin e Uashingtonit për ndërprerjen e plotë të importit të naftës nga Rusia, çmimi i naftës bruto mund të kapërcejë 200 dollarë për fuçi.
Rusia është prodhuesi i dytë më i madh i naftës në botë pas Shteteve të Bashkuara. Eksportet ruse të naftës furnizojnë 8% të tregut global. Ndalimi i importit të naftës ruse nga perëndimi, sipas ekspertëve, nënkupton rritje të jashtëzakonshme të çmimit të naftës e po ashtu edhe të inflacionit që mund të shkaktoj turbullira financiare në shumë vende të botës.
