By 18-vjeçarja shqiptaro-kanadeze, Dorina Boka, do të përfaqësojë Kanadanë dhe qytetin e Peterborough-it në Kampionatin Botëror të Powerlifting-ut, që do të mbahet në Afrikën e Jugut.
Dorina ka nisur rrugëtimin e saj në sport që në fëmijëri, ku ka qenë kampione në gjimnastikë artistike, një pasion që i kultivoi disiplinën, përkushtimin dhe respektin ndaj sportit që në moshë të vogël. Në moshën 16-vjeçare, gjatë viteve të shkollës së mesme, ajo iu përkushtua powerlifting-ut, ndërsa njëkohësisht ishte aktive edhe në aktivitete të tjera jashtëshkollore.
Brenda një kohe të shkurtër, Dorina arriti rezultate të jashtëzakonshme në arenën sportive kanadeze, duke fituar vendin e parë në tre gara madhore kombëtare. Gara e saj e parë u zhvillua më 30 nëntor 2024 në Scarborough me ekipin Trinity Barbell. Më pas ajo triumfoi në Kampionatin Qendror Kanadez CanPL më 22 gusht 2025 në Quebec City dhe së fundmi fitoi edhe Kampionatin Kombëtar CanPL 2026 në St. John’s, Newfoundland.
Rruga drejt Kampionatit Botëror nuk ka qenë e lehtë. Dorina tregon se ka kaluar momente të vështira dhe sfiduese, por vendosmëria dhe puna e palodhur e kanë motivuar të vazhdojë përpara. Pavarësisht angazhimeve si gjimnaziste dhe tani si studente universitare, ajo shprehet se ende e ka të vështirë ta besojë nivelin e suksesit që ka arritur në sportin e powerlifting-ut.
Një rol të rëndësishëm në këtë rrugëtim kanë luajtur edhe dy vëllezërit e saj, të cilët kanë qenë ndër motivuesit dhe mbështetësit më të mëdhenj të Dorinës gjatë gjithë karrierës së saj sportive. Aktualisht, ajo po zhvillon stërvitje private me një trajner profesionist të kualifikuar, ndërsa gjatë Kampionatit Botëror do të jetë nën drejtimin e trajnerit të Team Canada.
Dorina Boka do të përfaqësojë Team Canada në “2026 IPF World Sub-Junior & Junior Classic & Equipped Powerlifting Championships”, që do të mbahet në Sun City të Afrikës së Jugut nga 18 deri më 29 gusht 2026. Ajo do të garojë më 24 gusht nën ngjyrat e Kanadasë.
Bizneset dhe organizatat që dëshirojnë të mbështesin këtë sportiste të re shqiptaro-kanadeze, e cila përfaqëson me krenari Peterborough-in dhe Kanadanë në arenën ndërkombëtare, janë të mirëpritura të kontribuojnë në këtë rrugëtim të rëndësishëm sportiv.
