By Toronto, 4 Maj 2025 – Komuniteti shqiptar u mblodh në Toronto për të festuar promovimin zyrtar të Shoqatës “Çamëria në Kanada”. Kjo ngjarje e rëndësishme për diasporën shqiptare shënon një hap të madh drejt ruajtjes dhe promovimit të identitetit çam në emigracion.
Në sallën ku ishin mbledhur dhjetëra shqiptarë nga Toronto dhe qytete të tjera kanadeze, mbrëmjen e hapi Mergleda Hodo, një nga themelueset e shoqatës, e cila ndau vizionin e kësaj nisme: krijimin e një hapësire të organizuar për të mbajtur gjallë kulturën, historinë dhe shpirtin e Çamërisë në tokën e largët kanadeze.
Të pranishmit patën kënaqësinë të dëgjojnë edhe fjalimet e shkrimtarëve të njohur shqiptarë, Artan Gjyzel Hasani dhe Përparim Kapllani, të cilët theksuan rëndësinë e kujtesës historike dhe nevojën për unitet në mërgatë.
Programi artistik u pasurua me recitime nga Samanta Muso, Aleks Koçi dhe Merita Kadiri, ndërsa këngët e interpretuara nga Olivia Xoxa dhe Dritan Ajdini sollën emocion dhe krenari. Veçanërisht u duartrokit performanca e grupit “Marlee Got Talent”, që ndezi atmosferën me valle tradicionale çame.
Eventi u moderua me elegancë nga Edlira Çini, me skenar të përgatitur nga Mergleda Hodo dhe drejtim artistik nga muzikanti Gojard Kodra.
Themeluesit e shoqatës “Çamëria në Kanada” janë: Skerdilajd Sejko, Mergleda Hodo, Gojard Kodra, Ridvan Gjyzeli dhe Besnik Isufi – një grup me përkushtim ndaj ruajtjes së identitetit dhe trashëgimisë çame në Kanada.
Kjo ngjarje përfaqëson jo vetëm një moment simbolik, por një nisje konkrete për krijimin e një zëri të fortë çam në diasporë, i cili synon të ruajë lidhjen me rrënjët dhe të kultivojë trashëgiminë e vyer që sjell Çamëria.
