By Ekspozita “Poezi e Heshtur” sjell një përvojë të pasur kulturore dhe artistike në Toronto, duke bashkuar 26 artistë të talentuar nga e gjithë Kanadaja dhe përtej, për të shfaqur mbi 100 vepra të artit vizual. Ekspozita, që do të jetë e hapur nga 12 Shkurti deri më 9 Mars 2025, në Todmorden Mills Heritage Site, ofron një mundësi të shkëlqyer për të eksploruar artin që bashkon traditat dhe kulturën shqiptaro-kanadeze.
Kjo ngjarje kulturore është një mundësi për të përjetuar një gamë të gjerë veprash artistike që përfshijnë piktura, skulptura, dhe media të tjera, të cilat komunikojnë mesazhe përtej fjalëve. Po ashtu, ekspozita do të përfshijë aktivitete interaktive si seanca pikture nga jeta me modelet e veshura me kostume tradicionale shqiptare, si dhe një klasë pikture për fëmijë të moshës 10-15 vjeç.
Ekspozita shënon edicionin e pestë të aktivitetit të Artistëve Shqiptaro-Kanadezë dhe është mbështetur nga organizata të njohura si Albanian Canadian Development Alternative (ACDA) dhe Marlee’s Got Talent (MGT), që e kanë promovuar gjithashtu zhvillimin dhe shkëmbimin kulturor në komunitet.
Ceremonia e hapjes do të zhvillohet më 13 Shkurt 2025, ku artistët do të jenë të pranishëm për të ndarë historitë e tyre dhe për të biseduar me vizitorët. Ekspozita përfshin gjithashtu një katalog dixhital që do të përshkruajë aktivitetin dhe veprat e artistëve pjesëmarrës.
Për të mbështetur këtë ngjarje, organizatori Ardian Radovicka falenderon Konsullatën e Përgjithshme të Republikës së Kosovës në Toronto dhe Konsullit të Përgjithshëm z.Kadri Dakaj për kujdesin dhe mbështetjen financiare në këtë ekspozitë, sponsorët e nderuar: VOLT Engineering Inc, Liljana Vaso dhe Ecolog Inc, që sponsorizuan këtë festë të artit dhe të kulturës.
Një falënderim i veçantë shkon për z. Philip Cheong, koordinator i Muzeut, për gatishmërinë e tij për ta bërë këtë proces sa më efektiv si dhe për kurimin e ekspozitës. Në vazhdim, gjej rastin të falënderoj të gjithë artistët dhe ata që bashkëpunuan në mbarëvajtjen e ekspozitës dhe eventeve të saj speciale: Rudin Daklin, Ina Kocaqi Xoxën, Evis Lasku-Radovickën, Frida Vokshin, Elda Daklin, Angela Paparizon, Marelba Fushekatin, Ermal Xhixhën, Vilma Saracin, Edlira Efovin, Imelda Priftin, Dea Radovickën dhe Lorgen Halin.
