By I konsideruar nga shumë si futbollisti më i mirë ndonjëherë, Pele është lojtari i vetëm në histori që ka fituar tre Kupa Botërore, të parën kur ishte adoleshent.
Futbollisti brazilian Pele vdiq sot (e enjte) në moshën 82-vjeçare.
Prej ditësh ai ishte shtruar në spital, pasi trupi i tij nuk i përgjigjej më kimioterapisë duke kaluar në terapi intensive pas betejës me kancerin në zorrën e trashë. Braziliani Pele konsiderohet si ‘Mbreti’ i futbollit.
Pele ishte mbreti brazilian i futbollit që ka fituar tri kupa të botës dhe konsiderohet ndër futbollistët më të mirë të të gjitha kohërave.
Ai hyri në Librin e Rekordeve Guinness si golashënuesi më i mirë në historinë e futbollit pasi gjatë karrierës 21-vjeçare si lojtar shënoi 1279 gola në 1363 ndeshje, përfshirë ndeshjet miqësore.
Pele lindi në tetor të vitit 1940 në Tres Coraçoes të Brazilit. Emri i tij i vërtetë është Edson Arantes do Nascimento, i quajtur kështu për nder të shpikësit të madh amerikan Tomas Edison. As ai vetë nuk e mbante mend se si i ngeli që i vogël nofka “Pele”, të cilën nuk e pëlqente. Megjithatë ishte ky emër që do të kthehej në një simbol të vërtetë futbolli, që sipas një sondazhi në vitet ’70, ishte marka më e njohur në Europë pas “Coca Cola”-s.
Bota do të njihej për herë të parë me talentin brazilian në Kupën e Botës të vitit 1958 në Suedi. Ai nuk arriti të luajë në dy ndeshjet e para, por në çerekfinale shënoi golin e fitores ndaj Uellsit, kurse në gjysmëfinale shënoi tre golat në fitoren 5-2 të Brazilit ndaj Francës. Në finale, ku “Seleçao” triumfoi me të njëjtin rezultat ndaj vendit mikpritës të Kupës, Pele shënoi dy gola. Pas ndeshjes shokët e ekipit e mbajtën në krahë djaloshin që e kishte bërë vendin e vet të fitonte për herë të parë trofeun Kupës së Botës. Legjenda kishte lindur tashmë.
Për Pelen është shkruar e thënë shumë, por mbase përshkrimi më i saktë është ai që “Mbreti” i ka bërë vetes: “Unë kam lindur për futbollin, ashtu si Bethoveni ka lindur për muzikën dhe Mikelanxhelo për pikturën.”
