By Prej datës 27 gusht deri më 1 shtator 2022, ansambli “ Shqiponjat e vogla” mori pjesë në Festivalin Ndërkombëtar në Stamboll të Turqisë. Siparin e koncerteve, ansambli e hapi ditën e dielë në datën 28 gusht në ”Ceçenistan Park” në praninë e shumë spektatorëve. Ansambli i Bosnje-Hercegovinës u ngjit në skenë i pari dhe më pas rradhën e kish ansambli “Shqiponjat e vogla”, i cili udhëtoi nga Kanadaja e largët duke prezantuar kulturën shqiptare, këngët e vallet e Shqipërisë nga të rinj që janë lindur në Kanada por që i duan dhe i ruajnë gjuhën, zakonet, vallet e këngët e prindërve të tyre”; kështu u prezantua ansambli shqiptar përpara spektatorit të huaj.
”Nata Tiranase” ishte tema me motive shqiptare që koreografi i mirënjohur shqiptar Ramazan Këllezi, së bashku me grupin nga Ontario dhe me praninë e këngëtares së talentuar shqiptare Zina Zdrava ”Mjeshtër i Madh”, kishin rezervuar për publikun ndërkombëtar.
Eleganca e vallatareve shqiptare, kostumografia tipike e Shqipërisë së Mesme me dimitet e bardha, ndriçuan skenën duke interpretuar me shumë profesionalizëm montazhin e dasmës Tiranase ku së bashku me djemtë sollën për të pranishmit ritin martesor me një nivel artistik që rrëmbeu vëmendjen e të gjithë spektatorit.
Zina Zdrava dhe mjeshtërisa e saj artistike ishte një tjetër surprizë për artdashësit që e ndoqën nga afër spektaklin. Zdrava interpretoi me profesionalizëm repertorin artistik të Shqipërisë se mesme, dhe apsolutisht performanca e saj ngriti peshë me duartrokitje publikun.
E gjithë performanca shqipfolëse ishte nën shoqërimin e valëvitjes së flamurit kombëtar, simbolit të padiskutueshëm të krenarisë.
Një perlë e koreografisë shqiptare ishte edhe vallja e vajzave të Tiranës që padyshim entuziazmoi të pranishmit të cilët dhuruan duartrokitje të gjata.
Vëmendje të merituar i dha edhe Kryetari i Bashkisë i cili i dorëzoi z. Këllezi (presidenti i ansamblit) trofeun e festivalit duke vlerësuar së tepërmi pjesëmarrjen dhe paraqitjen dinjitoze të ”Shqiponjave të vogla”. Njëherësh valltarja Uarda Kellezi i dhuroi një hartë të Shqipërisë punuar me gur, dhuratë që u prit mjaft mirë nga nënkryetari i Bashkisë.
Ansamble të tjera pjesëmarrëse ishin edhe Turqia, Rumania, Gjeorgjia etj
Ne daten 29 gusht, ansambli shqiptar mori pjesë në paradën e organizuar në Kartal-Carsi së bashku me të gjitha grupet pjesëmarrëse në Festivalin e Stambolit, e cila krijoi një atmosferë tepër festive dhe lidhi më shumë të rinjtë artistë me njëri-tjetrin.
Prania e Liliana Cingut “ Nder i Kombit” natyrisht që ia rriti vlerat këtij ansambli dhe mbretëresha e valles popullore i stolisi e zbukuroi valltaret tona si vetëm ajo di, me dëshirë e shumë kënaqësi.
Mbrëmjen e tretë, ansambli ”Shqiponjave e vogla” u ngjit në skenë i treti duke u prezantuar me vallen e Librazhdit, vallen e Kosovës si dhe Tropojes. Një interpretim i mrekullueshëm i valletareve dhe duartrokitje të gjata nga spektatorët për atë që shikonin, ndjenin dhe vlerësonin. Presidenti i Festivalit z. Bulend Ozun vlerësoi interpetimin e valleve, kostumet , këngëtaren Zina Zdrava si dhe interpretimin e valletareve duke na siguruar se vitin e ardhshëm do të jenë sërish të mirëpritur në festival.
Më 30 gush , organizatorët e festivalit kishin menduar ti ndanin vlerësimet e fesivalit në një shëtitje me anije në Bosfor, ku grupin shqiptar e nderoi me praninë e tij edhe Bora Zukali, President i Shoqates Vatra në Turqi së bashku me familjen e tij si dhe Znj. Firdes Ogut me djalin e saj Denis.
Pas një ceremonie traditë në shpërndarjen e falenderimeve apo çmimeve të grupet pjesëmarrëse, presidentit të grupit shqiptar Ramazan Këllezi iu dorëzuan trofeu i pjesëmarrjes në festival si dhe medalja e festivalit së bashku me diplomën e pjesëmarrjes. Ishte një moment emocionues që u përcoll me duartrokitjet e të pranishmëve dhe në veçanti të grupit shqiptar që po e ndiqte këtë moment me shumë interes.
Ansambli ”Shqiponjave e vogla” është e vetmja pikëtakimi mes trashëgimisë shpirtërore dhe folklorit shqiptar në Kanada. Puna e padisktueshme e koreografit shqiptar prej më shumë se një dekade, Ramazan Këllezi, rrit vlerat e pjesëmarrjes nëpër aktivitete dinjitoze për prezantimin e kulturës shqiptare edhe në arenën ndërkombetare, duke i lënë hapur derën festivaleve të tjera në vijim.
Bashkëpunëtorët pjesëmarrës që mundësuan arritjen e këtij aktiviteti ishin një dëshmi se mes komunitetit ka vullnet të mirë për trasnmetimin dhe ruajtjen e vlerave kombëtare.
